NUM 6:1 וידבר יהוה אל-משה לאמר.
NUM 6:2 דבר אל-בני ישראל ואמרת אלהם איש או-אשה כי יפלא לנדר נדר נזיר להזיר ליהוה.
NUM 6:3 מיין ושכר יזיר חמץ יין וחמץ שכר לא ישתה וכל-משרת ענבים לא ישתה וענבים לחים ויבשים לא יאכל.
NUM 6:4 כל ימי נזרו מכל אשר יעשה מגפן היין מחרצנים ועד-זג לא יאכל.
NUM 6:5 כל-ימי נדר נזרו תער לא-יעבר על-ראשו עד-מלאת הימם אשר-יזיר ליהוה קדש יהיה גדל פרע שער ראשו.
NUM 6:6 כל-ימי הזירו ליהוה על-נפש מת לא יבא.
NUM 6:7 לאביו ולאמו לאחיו ולאחתו לא-יטמא להם במתם כי נזר אלהיו על- ראשו.
NUM 6:8 כל ימי נזרו קדש הוא ליהוה.
NUM 6:9 וכי-ימות מת עליו בפתע פתאם וטמא ראש נזרו וגלח ראשו ביום טהרתו ביום השביעי יגלחנו.
NUM 6:10 וביום השמיני יבא שתי תרים או שני בני יונה אל-הכהן אל-פתח אהל מועד.
NUM 6:11 ועשה הכהן אחד לחטאת ואחד לעלה וכפר עליו מאשר חטא על-הנפש וקדש את-ראשו ביום ההוא.
NUM 6:12 והזיר ליהוה את-ימי נזרו והביא כבש בן-שנתו לאשם והימים הראשנים יפלו כי טמא נזרו.
NUM 6:13 וזאת תורת הנזיר ביום מלאת ימי נזרו יביא אתו אל-פתח אהל מועד.
NUM 6:14 והקריב את-קרבנו ליהוה כבש בן-שנתו תמים אחד לעלה וכבשה אחת בת- שנתה תמימה לחטאת ואיל-אחד תמים לשלמים.
NUM 6:15 וסל מצות סלת חלת בלולת בשמן ורקיקי מצות משחים בשמן ומנחתם ונסכיהם.
NUM 6:16 והקריב הכהן לפני יהוה ועשה את-חטאתו ואת-עלתו.
NUM 6:17 ואת-האיל יעשה זבח שלמים ליהוה על סל המצות ועשה הכהן את-מנחתו ואת-נסכו.
NUM 6:18 וגלח הנזיר פתח אהל מועד את-ראש נזרו ולקח את-שער ראש נזרו ונתן על-האש אשר-תחת זבח השלמים.
NUM 6:19 ולקח הכהן את-הזרע בשלה מן-האיל וחלת מצה אחת מן-הסל ורקיק מצה אחד ונתן על-כפי הנזיר אחר התגלחו את-נזרו.
NUM 6:20 והניף אותם הכהן תנופה לפני יהוה קדש הוא לכהן על חזה התנופה ועל שוק התרומה ואחר ישתה הנזיר יין.
NUM 6:21 זאת תורת הנזיר אשר ידר קרבנו ליהוה על-נזרו מלבד אשר-תשיג ידו כפי נדרו אשר ידר כן יעשה על תורת נזרו.
NUM 6:22 וידבר יהוה אל-משה לאמר.
NUM 6:23 דבר אל-אהרן ואל-בניו לאמר כה תברכו את-בני ישראל אמור להם.
NUM 6:24 יברכך יהוה וישמרך.
NUM 6:25 יאר יהוה פניו אליך ויחנך.
NUM 6:26 ישא יהוה פניו אליך וישם לך שלום.
NUM 6:27 ושמו את-שמי על-בני ישראל ואני אברכם.