ECCLES 5:1 אל-תבהל על-פיך ולבך אל-ימהר להוציא דבר לפני האלהים כי האלהים בשמים ואתה על-הארץ על-כן יהיו דבריך מעטים.
ECCLES 5:2 כי בא החלום ברב ענין וקול כסיל ברב דברים.
ECCLES 5:3 כאשר תדר נדר לאלהים אל-תאחר לשלמו כי אין חפץ בכסילים את אשר- תדר שלם.
ECCLES 5:4 טוב אשר לא-תדר משתדור ולא תשלם.
ECCLES 5:5 אל-תתן את-פיך לחטיא את-בשרך ואל-תאמר לפני המלאך כי שגגה היא למה יקצף האלהים על-קולך וחבל את-מעשה ידיך.
ECCLES 5:6 כי ברב חלמות והבלים ודברים הרבה כי את-האלהים ירא.
ECCLES 5:7 אם-עשק רש וגזל משפט וצדק תראה במדינה אל-תתמה על-החפץ כי גבה מעל גבה שמר וגבהים עליהם.
ECCLES 5:8 ויתרון ארץ בכל היא מלך לשדה נעבד.
ECCLES 5:9 אהב כסף לא-ישבע כסף ומי-אהב בהמון לא תבואה גם-זה הבל.
ECCLES 5:10 ברבות הטובה רבו אוכליה ומה-כשרון לבעליה כי אם-ראית עיניו.
ECCLES 5:11 מתוקה שנת העבד אם-מעט ואם-הרבה יאכל והשבע לעשיר איננו מניח לו לישון.
ECCLES 5:12 יש רעה חולה ראיתי תחת השמש עשר שמור לבעליו לרעתו.
ECCLES 5:13 ואבד העשר ההוא בענין רע והוליד בן ואין בידו מאומה.
ECCLES 5:14 כאשר יצא מבטן אמו ערום ישוב ללכת כשבא ומאומה לא-ישא בעמלו שילך בידו.
ECCLES 5:15 וגם-זה רעה חולה כל-עמת שבא כן ילך ומה-יתרון לו שיעמל לרוח.
ECCLES 5:16 גם כל-ימיו בחשך יאכל וכעס הרבה וחליו וקצף.
ECCLES 5:17 הנה אשר-ראיתי אני טוב אשר-יפה לאכול-ולשתות ולראות טובה בכל- עמלו שיעמל תחת-השמש מספר ימי-חיו אשר-נתן-לו האלהים כי-הוא חלקו.
ECCLES 5:18 גם כל-האדם אשר נתן-לו האלהים עשר ונכסים והשליטו לאכל ממנו ולשאת את-חלקו ולשמח בעמלו זה מתת אלהים היא.
ECCLES 5:19 כי לא הרבה יזכר את-ימי חייו כי האלהים מענה בשמחת לבו.