ECCLES 9:1 כי את-כל-זה נתתי אל-לבי ולבור את-כל-זה אשר הצדיקים והחכמים ועבדיהם ביד האלהים גם-אהבה גם-שנאה אין יודע האדם הכל לפניהם.
ECCLES 9:2 הכל כאשר לכל מקרה אחד לצדיק ולרשע לטוב ולטהור ולטמא ולזבח ולאשר איננו זבח כטוב כחטא הנשבע כאשר שבועה ירא.
ECCLES 9:3 זה רע בכל אשר-נעשה תחת השמש כי-מקרה אחד לכל וגם לב בני-האדם מלא-רע והוללות בלבבם בחייהם ואחריו אל-המתים.
ECCLES 9:4 כי-מי אשר יבחר אל כל-החיים יש בטחון כי-לכלב חי הוא טוב מן- האריה המת.
ECCLES 9:5 כי החיים יודעים שימתו והמתים אינם יודעים מאומה ואין-עוד להם שכר כי נשכח זכרם.
ECCLES 9:6 גם אהבתם גם-שנאתם גם-קנאתם כבר אבדה וחלק אין-להם עוד לעולם בכל אשר-נעשה תחת השמש.
ECCLES 9:7 לך אכל בשמחה לחמך ושתה בלב-טוב יינך כי כבר רצה האלהים את- מעשיך.
ECCLES 9:8 בכל-עת יהיו בגדיך לבנים ושמן על-ראשך אל-יחסר.
ECCLES 9:9 ראה חיים עם-אשה אשר-אהבת כל-ימי חיי הבלך אשר נתן-לך תחת השמש כל ימי הבלך כי הוא חלקך בחיים ובעמלך אשר-אתה עמל תחת השמש.
ECCLES 9:10 כל אשר תמצא ידך לעשות בכחך עשה כי אין מעשה וחשבון ודעת וחכמה בשאול אשר אתה הלך שמה.
ECCLES 9:11 שבתי וראה תחת-השמש כי לא לקלים המרוץ ולא לגבורים המלחמה וגם לא לחכמים לחם וגם לא לנבנים עשר וגם לא לידעים חן כי-עת ופגע יקרה את-כלם.
ECCLES 9:12 כי גם לא-ידע האדם את-עתו כדגים שנאחזים במצודה רעה וכצפרים האחזות בפח כהם יוקשים בני האדם לעת רעה כשתפול עליהם פתאם.
ECCLES 9:13 גם-זה ראיתי חכמה תחת השמש וגדולה היא אלי.
ECCLES 9:14 עיר קטנה ואנשים בה מעט ובא-אליה מלך גדול וסבב אתה ובנה עליה מצודים גדלים.
ECCLES 9:15 ומצא בה איש מסכן חכם ומלט-הוא את-העיר בחכמתו ואדם לא זכר את- האיש המסכן ההוא.
ECCLES 9:16 ואמרתי אני טובה חכמה מגבורה וחכמת המסכן בזויה ודבריו אינם נשמעים.
ECCLES 9:17 דברי חכמים בנחת נשמעים מזעקת מושל בכסילים.
ECCLES 9:18 טובה חכמה מכלי קרב וחוטא אחד יאבד טובה הרבה.