JER 48:1 למואב כה-אמר יהוה צבאות אלהי ישראל הוי אל-נבו כי שדדה הבישה נלכדה קריתים הבישה המשגב וחתה.
JER 48:2 אין עוד תהלת מואב בחשבון חשבו עליה רעה לכו ונכריתנה מגוי גם- מדמן תדמי אחריך תלך חרב.
JER 48:3 קול צעקה מחרונים שד ושבר גדול.
JER 48:4 נשברה מואב השמיעו זעקה צעוריה.
JER 48:5 כי מעלה הלחות בבכי יעלה-בכי כי במורד חורנים צרי צעקת-שבר שמעו.
JER 48:6 נסו מלטו נפשכם ותהיינה כערוער במדבר.
JER 48:7 כי יען בטחך במעשיך ובאוצרותיך גם-את תלכדי ויצא כמיש בגולה כהניו ושריו יחד.
JER 48:8 ויבא שדד אל-כל-עיר ועיר לא תמלט ואבד העמק ונשמד המישר אשר אמר יהוה.
JER 48:9 תנו-ציץ למואב כי נצא תצא ועריה לשמה תהיינה מאין יושב בהן.
JER 48:10 ארור עשה מלאכת יהוה רמיה וארור מנע חרבו מדם.
JER 48:11 שאנן מואב מנעוריו ושקט הוא אל-שמריו ולא-הורק מכלי אל-כלי ובגולה לא הלך על-כן עמד טעמו בו וריחו לא נמר.
JER 48:12 לכן הנה-ימים באים נאם-יהוה ושלחתי-לו צעים וצעהו וכליו יריקו ונבליהם ינפצו.
JER 48:13 ובש מואב מכמוש כאשר-בשו בית ישראל מבית אל מבטחם.
JER 48:14 איך תאמרו גבורים אנחנו ואנשי-חיל למלחמה.
JER 48:15 שדד מואב ועריה עלה ומבחר בחוריו ירדו לטבח נאם-המלך יהוה צבאות שמו.
JER 48:16 קרוב איד-מואב לבוא ורעתו מהרה מאד.
JER 48:17 נדו לו כל-סביביו וכל ידעי שמו אמרו איכה נשבר מטה-עז מקל תפארה.
JER 48:18 רדי מכבוד ישבי בצמא ישבת בת-דיבון כי-שדד מואב עלה בך שחת מבצריך.
JER 48:19 אל-דרך עמדי וצפי יושבת ערוער שאלי-נס ונמלטה אמרי מה-נהיתה.
JER 48:20 הביש מואב כי-חתה הילילי וזעקי הגידו בארנון כי שדד מואב.
JER 48:21 ומשפט בא אל-ארץ המישר אל-חלון ואל-יהצה ועל-מופעת.
JER 48:22 ועל-דיבון ועל-נבו ועל-בית דבלתים.
JER 48:23 ועל קריתים ועל-בית גמול ועל-בית מעון.
JER 48:24 ועל-קריות ועל-בצרה ועל כל-ערי ארץ מואב הרחקות והקרבות.
JER 48:25 נגדעה קרן מואב וזרעו נשברה נאם יהוה.
JER 48:26 השכירהו כי על-יהוה הגדיל וספק מואב בקיאו והיה לשחק גם-הוא.
JER 48:27 ואם לוא השחק היה לך ישראל אם-בגנבים נמצאה כי-מדי דבריך בו תתנודד.
JER 48:28 עזבו ערים ושכנו בסלע ישבי מואב והיו כיונה תקנן בעברי פי-פחת.
JER 48:29 שמענו גאון-מואב גאה מאד גבהו וגאונו וגאותו ורם לבו.
JER 48:30 אני ידעתי נאם-יהוה עברתו ולא-כן בדיו לא-כן עשו.
JER 48:31 על-כן על-מואב איליל ולמואב כלה אזעק אל-אנשי קיר-חרש יהגה.
JER 48:32 מבכי יעזר אבכה-לך הגפן שבמה נטישתיך עברו ים עד ים יעזר נגעו על-קיצך ועל-בצירך שדד נפל.
JER 48:33 ונאספה שמחה וגיל מכרמל ומארץ מואב ויין מיקבים השבתי לא-ידרך הידד הידד לא הידד.
JER 48:34 מזעקת חשבון עד-אלעלה עד-יהץ נתנו קולם מצער עד-חרנים עגלת שלשיה כי גם-מי נמרים למשמות יהיו.
JER 48:35 והשבתי למואב נאם-יהוה מעלה במה ומקטיר לאלהיו.
JER 48:36 על-כן לבי למואב כחללים יהמה ולבי אל-אנשי קיר-חרש כחלילים יהמה על-כן יתרת עשה אבדו.
JER 48:37 כי כל-ראש קרחה וכל-זקן גרעה על כל-ידים גדדת ועל-מתנים שק.
JER 48:38 על כל-גגות מואב וברחבתיה כלה מספד כי-שברתי את-מואב ככלי אין- חפץ בו נאם-יהוה.
JER 48:39 איך חתה הילילו איך הפנה-ערף מואב בוש והיה מואב לשחק ולמחתה לכל-סביביו.
JER 48:40 כי-כה אמר יהוה הנה כנשר ידאה ופרש כנפיו אל-מואב.
JER 48:41 נלכדה הקריות והמצדות נתפשה והיה לב גבורי מואב ביום ההוא כלב אשה מצרה.
JER 48:42 ונשמד מואב מעם כי על-יהוה הגדיל.
JER 48:43 פחד ופחת ופח עליך יושב מואב נאם-יהוה.
JER 48:44 הניס מפני הפחד יפל אל-הפחת והעלה מן-הפחת ילכד בפח כי-אביא אליה אל-מואב שנת פקדתם נאם-יהוה.
JER 48:45 בצל חשבון עמדו מכח נסים כי-אש יצא מחשבון ולהבה מבין סיחון ותאכל פאת מואב וקדקד בני שאון.
JER 48:46 אוי-לך מואב אבד עם-כמוש כי-לקחו בניך בשבי ובנתיך בשביה.
JER 48:47 ושבתי שבות-מואב באחרית הימים נאם-יהוה עד-הנה משפט מואב.