LAM 1:1 איכה ישבה בדד העיר רבתי עם היתה כאלמנה רבתי בגוים שרתי במדינות היתה למס.
LAM 1:2 בכו תבכה בלילה ודמעתה על לחיה אין-לה מנחם מכל-אהביה כל-רעיה בגדו בה היו לה לאיבים.
LAM 1:3 גלתה יהודה מעני ומרב עבדה היא ישבה בגוים לא מצאה מנוח כל- רדפיה השיגוה בין המצרים.
LAM 1:4 דרכי ציון אבלות מבלי באי מועד כל-שעריה שוממין כהניה נאנחים בתולתיה נוגות והיא מר-לה.
LAM 1:5 היו צריה לראש איביה שלו כי-יהוה הוגה על רב-פשעיה עולליה הלכו שבי לפני-צר.
LAM 1:6 ויצא מן בת-ציון כל-הדרה היו שריה כאילים לא-מצאו מרעה וילכו בלא-כח לפני רודף.
LAM 1:7 זכרה ירושלם ימי עניה ומרודיה כל מחמדיה אשר היו מימי קדם בנפל עמה ביד-צר ואין עוזר לה ראוה צרים שחקו על משבתה.
LAM 1:8 חטא חטאה ירושלם על-כן לנידה היתה כל-מכבדיה הזילוה כי-ראו ערותה גם-היא נאנחה ותשב אחור.
LAM 1:9 טמאתה בשוליה לא זכרה אחריתה ותרד פלאים אין מנחם לה ראה יהוה את-עניי כי הגדיל אויב.
LAM 1:10 ידו פרש צר על כל-מחמדיה כי-ראתה גוים באו מקדשה אשר צויתה לא- יבאו בקהל לך.
LAM 1:11 כל-עמה נאנחים מבקשים לחם נתנו מחמודיהם באכל להשיב נפש ראה יהוה והביטה כי הייתי זוללה.
LAM 1:12 לוא אליכם כל-עברי דרך הביטו וראו אם-יש מכאוב כמכאבי אשר עולל לי אשר הוגה יהוה ביום חרון אפו.
LAM 1:13 ממרום שלח-אש בעצמתי וירדנה פרש רשת לרגלי השיבני אחור נתנני שממה כל-היום דוה.
LAM 1:14 נשקד על פשעי בידו ישתרגו עלו על-צוארי הכשיל כחי נתנני אדני בידי לא-אוכל קום.
LAM 1:15 סלה כל-אבירי אדני בקרבי קרא עלי מועד לשבר בחורי גת דרך אדני לבתולת בת-יהודה.
LAM 1:16 על-אלה אני בוכיה עיני עיני ירדה מים כי-רחק ממני מנחם משיב נפשי היו בני שוממים כי גבר אויב.
LAM 1:17 פרשה ציון בידיה אין מנחם לה צוה יהוה ליעקב סביביו צריו היתה ירושלם לנדה ביניהם.
LAM 1:18 צדיק הוא יהוה כי פיהו מריתי שמעו-נא כל-עמים וראו מכאבי בתולתי ובחורי הלכו בשבי.
LAM 1:19 קראתי למאהבי המה רמוני כהני וזקני בעיר גועו כי-בקשו אכל למו וישיבו את-נפשם.
LAM 1:20 ראה יהוה כי-צר-לי מעי חמרמרו נהפך לבי בקרבי כי מרו מריתי מחוץ שכלה-חרב בבית כמות.
LAM 1:21 שמעו כי נאנחה אני אין מנחם לי כל-איבי שמעו רעתי ששו כי אתה עשית הבאת יום-קראת ויהיו כמוני.
LAM 1:22 תבא כל-רעתם לפניך ועולל למו כאשר עוללת לי על כל-פשעי כי-רבות אנחתי ולבי דוי.