LAM 3:1 אני הגבר ראה עני בשבט עברתו.
LAM 3:2 אותי נהג וילך חשך ולא-אור.
LAM 3:3 אך בי ישב יהפך ידו כל-היום.
LAM 3:4 בלה בשרי ועורי שבר עצמותי.
LAM 3:5 בנה עלי ויקף ראש ותלאה.
LAM 3:6 במחשכים הושיבני כמתי עולם.
LAM 3:7 גדר בעדי ולא אצא הכביד נחשתי.
LAM 3:8 גם כי אזעק ואשוע שתם תפלתי.
LAM 3:9 גדר דרכי בגזית נתיבתי עוה.
LAM 3:10 דב ארב הוא לי אריה במסתרים.
LAM 3:11 דרכי סורר ויפשחני שמני שמם.
LAM 3:12 דרך קשתו ויציבני כמטרא לחץ.
LAM 3:13 הביא בכליותי בני אשפתו.
LAM 3:14 הייתי שחק לכל-עמי נגינתם כל-היום.
LAM 3:15 השביעני במרורים הרוני לענה.
LAM 3:16 ויגרס בחצץ שני הכפישני באפר.
LAM 3:17 ותזנח משלום נפשי נשיתי טובה.
LAM 3:18 ואמר אבד נצחי ותוחלתי מיהוה.
LAM 3:19 זכר-עניי ומרודי לענה וראש.
LAM 3:20 זכור תזכור ותשיח עלי נפשי.
LAM 3:21 זאת אשיב אל-לבי על-כן אוחיל.
LAM 3:22 חסדי יהוה כי לא-תמנו כי לא-כלו רחמיו.
LAM 3:23 חדשים לבקרים רבה אמונתך.
LAM 3:24 חלקי יהוה אמרה נפשי על-כן אוחיל לו.
LAM 3:25 טוב יהוה לקוו לנפש תדרשנו.
LAM 3:26 טוב ויחיל ודומם לתשועת יהוה.
LAM 3:27 טוב לגבר כי-ישא על בנעוריו.
LAM 3:28 ישב בדד וידם כי נטל עליו.
LAM 3:29 יתן בעפר פיהו אולי יש תקוה.
LAM 3:30 יתן למכהו לחי ישבע בחרפה.
LAM 3:31 כי לא יזנח לעולם אדני.
LAM 3:32 כי אם-הוגה ורחם כרב חסדו.
LAM 3:33 כי לא ענה מלבו ויגה בני-איש.
LAM 3:34 לדכא תחת רגליו כל אסירי ארץ.
LAM 3:35 להטות משפט-גבר נגד פני עליון.
LAM 3:36 לעות אדם בריבו אדני לא ראה.
LAM 3:37 מי זה אמר ותהי אדני לא צוה.
LAM 3:38 מפי עליון לא תצא הרעות והטוב.
LAM 3:39 מה-יתאונן אדם חי גבר על-חטאו.
LAM 3:40 נחפשה דרכינו ונחקרה ונשובה עד-יהוה.
LAM 3:41 נשא לבבנו אל-כפים אל-אל בשמים.
LAM 3:42 נחנו פשענו ומרינו אתה לא סלחת.
LAM 3:43 סכתה באף ותרדפנו הרגת לא חמלת.
LAM 3:44 סכותה בענן לך מעבור תפלה.
LAM 3:45 סחי ומאוס תשימנו בקרב העמים.
LAM 3:46 פצו עלינו פיהם כל-איבינו.
LAM 3:47 פחד ופחת היה לנו השאת והשבר.
LAM 3:48 פלגי-מים תרד עיני על-שבר בת-עמי.
LAM 3:49 עיני נגרה ולא תדמה מאין הפגות.
LAM 3:50 עד-ישקיף וירא יהוה משמים.
LAM 3:51 עיני עוללה לנפשי מכל בנות עירי.
LAM 3:52 צוד צדוני כצפור איבי חנם.
LAM 3:53 צמתו בבור חיי וידו-אבן בי.
LAM 3:54 צפו-מים על-ראשי אמרתי נגזרתי.
LAM 3:55 קראתי שמך יהוה מבור תחתיות.
LAM 3:56 קולי שמעת אל-תעלם אזנך לרוחתי לשועתי.
LAM 3:57 קרבת ביום אקראך אמרת אל-תירא.
LAM 3:58 רבת אדני ריבי נפשי גאלת חיי.
LAM 3:59 ראיתה יהוה עותתי שפטה משפטי.
LAM 3:60 ראיתה כל-נקמתם כל-מחשבתם לי.
LAM 3:61 שמעת חרפתם יהוה כל-מחשבתם עלי.
LAM 3:62 שפתי קמי והגיונם עלי כל-היום.
LAM 3:63 שבתם וקימתם הביטה אני מנגינתם.
LAM 3:64 תשיב להם גמול יהוה כמעשה ידיהם.
LAM 3:65 תתן להם מגנת-לב תאלתך להם.
LAM 3:66 תרדף באף ותשמידם מתחת שמי יהוה.