PROV 27:1 אל-תתהלל ביום מחר כי לא-תדע מה-ילד יום.
PROV 27:2 יהללך זר ולא-פיך נכרי ואל-שפתיך.
PROV 27:3 כבד-אבן ונטל החול וכעס אויל כבד משניהם.
PROV 27:4 אכזריות חמה ושטף אף ומי יעמד לפני קנאה.
PROV 27:5 טובה תוכחת מגלה מאהבה מסתרת.
PROV 27:6 נאמנים פצעי אוהב ונעתרות נשיקות שונא.
PROV 27:7 נפש שבעה תבוס נפת ונפש רעבה כל-מר מתוק.
PROV 27:8 כצפור נודדת מן-קנה כן-איש נודד ממקומו.
PROV 27:9 שמן וקטרת ישמח-לב ומתק רעהו מעצת-נפש.
PROV 27:10 רעך ורעה אביך אל-תעזב ובית אחיך אל-תבוא ביום אידך טוב שכן קרוב מאח רחוק.
PROV 27:11 חכם בני ושמח לבי ואשיבה חרפי דבר.
PROV 27:12 ערום ראה רעה נסתר פתאים עברו נענשו.
PROV 27:13 קח-בגדו כי-ערב זר ובעד נכריה חבלהו.
PROV 27:14 מברך רעהו בקול גדול בבקר השכים קללה תחשב לו.
PROV 27:15 דלף טורד ביום סגריר ואשת מדונים נשתוה.
PROV 27:16 צפניה צפן-רוח ושמן ימינו יקרא.
PROV 27:17 ברזל בברזל יחד ואיש יחד פני-רעהו.
PROV 27:18 נצר תאנה יאכל פריה ושמר אדניו יכבד.
PROV 27:19 כמים הפנים לפנים כן לב-האדם לאדם.
PROV 27:20 שאול ואבדה לא תשבענה ועיני האדם לא תשבענה.
PROV 27:21 מצרף לכסף וכור לזהב ואיש לפי מהללו.
PROV 27:22 אם תכתוש-את-האויל במכתש בתוך הריפות בעלי לא-תסור מעליו אולתו.
PROV 27:23 ידע תדע פני צאנך שית לבך לעדרים.
PROV 27:24 כי לא לעולם חסן ואם-נזר לדור דור.
PROV 27:25 גלה חציר ונראה-דשא ונאספו עשבות הרים.
PROV 27:26 כבשים ללבושך ומחיר שדה עתודים.
PROV 27:27 ודי חלב עזים ללחמך ללחם ביתך וחיים לנערותיך.