PROV 31:1 ¶ Men Pawòl wa Lemwèl, men konsèy manman l' te ba li:
PROV 31:2 Kisa pou m' di ou, pitit mwen, pitit ki soti nan zantray mwen? Se mwen ki te mande Bondye pou l' ban mwen ou. Kisa pou m' di ou?
PROV 31:3 Pa gaspiye kouray ou nan fanm. Veye zo ou ak fanm k'ap fè malè chèf yo.
PROV 31:4 Lemwèl monchè, yon wa pa fèt pou nan bwè bweson. Chèf pa fèt pou nan bwè gwòg.
PROV 31:5 Lè yo bwè konsa, yo bliye lòd yo te bay. Yo p'ap pran ka malere yo.
PROV 31:6 Se moun ki dekouraje ak lavi ki tonbe nan gwòg. Se moun ki gen gwo lapenn nan kè yo ki lage kò yo nan bweson.
PROV 31:7 Yo bwè pou yo bliye mizè yo, pou yo pa chonje lapenn yo.
PROV 31:8 Louvri bouch ou pale pou moun ki pa ka pale pou tèt yo. Defann kòz moun ki san sekou yo.
PROV 31:9 Pale pou yo. Pa fè patipri. Defann kòz malere yo ak endijan yo.
PROV 31:10 ¶ Sa pa fasil pou moun jwenn yon bon madanm. Lè li jwenn li, li gen plis valè pase yon boul lò.
PROV 31:11 Mari l' mete tout konfyans li nan li. Tout bagay ap mache byen lakay li.
PROV 31:12 Madanm lan p'ap janm aji mal ak mari l', l'ap pase tout lavi l' ap fè l' byen.
PROV 31:13 Li chache lenn mouton ak fil swa, li travay yo fè twal ak men l'.
PROV 31:14 Tankou bato k'ap pote machandiz, li al byen lwen chache manje mete nan kay la.
PROV 31:15 Solèy poko leve, li gen tan sou pye l', l'ap pare manje pou moun nan kay la. L'ap di sèvant yo sa pou yo fè.
PROV 31:16 Li fè lide sou yon tè, li achte l' ak lajan li fè ak men l'. Li fè jaden rezen sou li.
PROV 31:17 Li mare ren l', li twouse manch rad li pou l' travay.
PROV 31:18 Li santi zafè l' ap mache byen, li rete byen ta lannwit ap travay.
PROV 31:19 Li file koton, li koud rad li.
PROV 31:20 Li lonje men l' bay pòv. Li pran ka malere.
PROV 31:21 Li pa pè fredi pou moun lakay li, paske tout moun gen rad cho pou mete sou yo.
PROV 31:22 Li fè kouvèti lenn pou kabann yo. Tout rad li yo fèt ak twal wouj tise byen sere.
PROV 31:23 Mari l', se yonn nan chèf fanmi lavil la. Tout moun lavil la ap nonmen non l' an byen.
PROV 31:24 Madanm li fe rad pou l' vann, li fè bèl senti, li vann yo ak machann.
PROV 31:25 Li gen anpil kouraj, tout moun respekte l', li pa pè denmen.
PROV 31:26 Lè li louvri bouch li, se bon konsèy li bay. Li toujou gen bon pawòl nan bouch li.
PROV 31:27 Li konnen vire tounen tout moun nan kay la. Li toujou gen yon bagay l'ap fè.
PROV 31:28 Tout pitit li yo ap fè l' konpliman. Mari l' menm ap fè lwanj li.
PROV 31:29 L'ap di: Mwen konnen anpil madanm. Men ou menm, nanpwen tankou ou!
PROV 31:30 Bèl fanm pa di bon madanm pou sa. Bèl figi pa la pou lontan. Men, y'a fè lwanj yon fanm ki gen krentif pou Seyè a.
PROV 31:31 Ba li sa ki pou li a. Lè y'a wè sa l' fè, se pou tout moun fè lwanj li.