1SAM 14:1 ויהי היום ויאמר יונתן בן-שאול אל-הנער נשא כליו לכה ונעברה אל- מצב פלשתים אשר מעבר הלז ולאביו לא הגיד.
1SAM 14:2 ושאול יושב בקצה הגבעה תחת הרמון אשר במגרון והעם אשר עמו כשש מאות איש.
1SAM 14:3 ואחיה בן-אחטוב אחי איכבוד בן-פינחס בן-עלי כהן יהוה בשלו נשא אפוד והעם לא ידע כי הלך יונתן.
1SAM 14:4 ובין המעברות אשר בקש יונתן לעבר על-מצב פלשתים שן-הסלע מהעבר מזה ושן-הסלע מהעבר מזה ושם האחד בוצץ ושם האחד סנה.
1SAM 14:5 השן האחד מצוק מצפון מול מכמש והאחד מנגב מול גבע.
1SAM 14:6 ויאמר יהונתן אל-הנער נשא כליו לכה ונעברה אל-מצב הערלים האלה אולי יעשה יהוה לנו כי אין ליהוה מעצור להושיע ברב או במעט.
1SAM 14:7 ויאמר לו נשא כליו עשה כל-אשר בלבבך נטה לך הנני עמך כלבבך.
1SAM 14:8 ויאמר יהונתן הנה אנחנו עברים אל-האנשים ונגלינו אליהם.
1SAM 14:9 אם-כה יאמרו אלינו דמו עד-הגיענו אליכם ועמדנו תחתינו ולא נעלה אליהם.
1SAM 14:10 ואם-כה יאמרו עלו עלינו ועלינו כי-נתנם יהוה בידנו וזה-לנו האות.
1SAM 14:11 ויגלו שניהם אל-מצב פלשתים ויאמרו פלשתים הנה עברים יצאים מן- החרים אשר התחבאו-שם.
1SAM 14:12 ויענו אנשי המצבה את-יונתן ואת-נשא כליו ויאמרו עלו אלינו ונודיעה אתכם דבר ויאמר יונתן אל-נשא כליו עלה אחרי כי-נתנם יהוה ביד ישראל.
1SAM 14:13 ויעל יונתן על-ידיו ועל-רגליו ונשא כליו אחריו ויפלו לפני יונתן ונשא כליו ממותת אחריו.
1SAM 14:14 ותהי המכה הראשנה אשר הכה יונתן ונשא כליו כעשרים איש כבחצי מענה צמד שדה.
1SAM 14:15 ותהי חרדה במחנה בשדה ובכל-העם המצב והמשחית חרדו גם-המה ותרגז הארץ ותהי לחרדת אלהים.
1SAM 14:16 ויראו הצפים לשאול בגבעת בנימן והנה ההמון נמוג וילך והלם.
1SAM 14:17 ויאמר שאול לעם אשר אתו פקדו-נא וראו מי הלך מעמנו ויפקדו והנה אין יונתן ונשא כליו.
1SAM 14:18 ויאמר שאול לאחיה הגישה ארון האלהים כי-היה ארון האלהים ביום ההוא ובני ישראל.
1SAM 14:19 ויהי עד דבר שאול אל-הכהן וההמון אשר במחנה פלשתים וילך הלוך ורב ויאמר שאול אל-הכהן אסף ידך.
1SAM 14:20 ויזעק שאול וכל-העם אשר אתו ויבאו עד-המלחמה והנה היתה חרב איש ברעהו מהומה גדולה מאד.
1SAM 14:21 והעברים היו לפלשתים כאתמול שלשום אשר עלו עמם במחנה סביב וגם- המה להיות עם-ישראל אשר עם-שאול ויונתן.
1SAM 14:22 וכל איש ישראל המתחבאים בהר-אפרים שמעו כי-נסו פלשתים וידבקו גם-המה אחריהם במלחמה.
1SAM 14:23 ויושע יהוה ביום ההוא את-ישראל והמלחמה עברה את-בית און.
1SAM 14:24 ואיש-ישראל נגש ביום ההוא ויאל שאול את-העם לאמר ארור האיש אשר- יאכל לחם עד-הערב ונקמתי מאיבי ולא טעם כל-העם לחם.
1SAM 14:25 וכל-הארץ באו ביער ויהי דבש על-פני השדה.
1SAM 14:26 ויבא העם אל-היער והנה הלך דבש ואין-משיג ידו אל-פיו כי-ירא העם את-השבעה.
1SAM 14:27 ויונתן לא-שמע בהשביע אביו את-העם וישלח את-קצה המטה אשר בידו ויטבל אותה ביערת הדבש וישב ידו אל-פיו ותראנה עיניו.
1SAM 14:28 ויען איש מהעם ויאמר השבע השביע אביך את-העם לאמר ארור האיש אשר-יאכל לחם היום ויעף העם.
1SAM 14:29 ויאמר יונתן עכר אבי את-הארץ ראו-נא כי-ארו עיני כי טעמתי מעט דבש הזה.
1SAM 14:30 אף כי לוא אכל אכל היום העם משלל איביו אשר מצא כי עתה לא-רבתה מכה בפלשתים.
1SAM 14:31 ויכו ביום ההוא בפלשתים ממכמש אילנה ויעף העם מאד.
1SAM 14:32 ויעש העם אל-שלל ויקחו צאן ובקר ובני בקר וישחטו-ארצה ויאכל העם על-הדם.
1SAM 14:33 ויגידו לשאול לאמר הנה העם חטאים ליהוה לאכל על-הדם ויאמר בגדתם גלו-אלי היום אבן גדולה.
1SAM 14:34 ויאמר שאול פצו בעם ואמרתם להם הגישו אלי איש שורו ואיש שיהו ושחטתם בזה ואכלתם ולא-תחטאו ליהוה לאכל אל-הדם ויגשו כל-העם איש שורו בידו הלילה וישחטו-שם.
1SAM 14:35 ויבן שאול מזבח ליהוה אתו החל לבנות מזבח ליהוה.
1SAM 14:36 ויאמר שאול נרדה אחרי פלשתים לילה ונבזה בהם עד-אור הבקר ולא- נשאר בהם איש ויאמרו כל-הטוב בעיניך עשה ויאמר הכהן נקרבה הלם אל- האלהים.
1SAM 14:37 וישאל שאול באלהים הארד אחרי פלשתים התתנם ביד ישראל ולא ענהו ביום ההוא.
1SAM 14:38 ויאמר שאול גשו הלם כל פנות העם ודעו וראו במה היתה החטאת הזאת היום.
1SAM 14:39 כי חי-יהוה המושיע את-ישראל כי אם-ישנו ביונתן בני כי מות ימות ואין ענהו מכל-העם.
1SAM 14:40 ויאמר אל-כל-ישראל אתם תהיו לעבר אחד ואני ויונתן בני נהיה לעבר אחד ויאמרו העם אל-שאול הטוב בעיניך עשה.
1SAM 14:41 ויאמר שאול אל-יהוה אלהי ישראל הבה תמים וילכד יונתן ושאול והעם יצאו.
1SAM 14:42 ויאמר שאול הפילו ביני ובין יונתן בני וילכד יונתן.
1SAM 14:43 ויאמר שאול אל-יונתן הגידה לי מה עשיתה ויגד-לו יונתן ויאמר טעם טעמתי בקצה המטה אשר-בידי מעט דבש הנני אמות.
1SAM 14:44 ויאמר שאול כה-יעשה אלהים וכה יוסף כי-מות תמות יונתן.
1SAM 14:45 ויאמר העם אל-שאול היונתן ימות אשר עשה הישועה הגדולה הזאת בישראל חלילה חי-יהוה אם-יפל משערת ראשו ארצה כי-עם-אלהים עשה היום הזה ויפדו העם את-יונתן ולא-מת.
1SAM 14:46 ויעל שאול מאחרי פלשתים ופלשתים הלכו למקומם.
1SAM 14:47 ושאול לכד המלוכה על-ישראל וילחם סביב בכל-איביו במואב ובבני- עמון ובאדום ובמלכי צובה ובפלשתים ובכל אשר-יפנה ירשיע.
1SAM 14:48 ויעש חיל ויך את-עמלק ויצל את-ישראל מיד שסהו.
1SAM 14:49 ויהיו בני שאול יונתן וישוי ומלכי-שוע ושם שתי בנתיו שם הבכירה מרב ושם הקטנה מיכל.
1SAM 14:50 ושם אשת שאול אחינעם בת-אחימעץ ושם שר-צבאו אבינר בן-נר דוד שאול.
1SAM 14:51 וקיש אבי-שאול ונר אבי-אבנר בן-אביאל.
1SAM 14:52 ותהי המלחמה חזקה על-פלשתים כל ימי שאול וראה שאול כל-איש גבור וכל-בן-חיל ויאספהו אליו.