1SAM 24:1 ויעל דוד משם וישב במצדות עין-גדי.
1SAM 24:2 ויהי כאשר שב שאול מאחרי פלשתים ויגדו לו לאמר הנה דוד במדבר עין גדי.
1SAM 24:3 ויקח שאול שלשת אלפים איש בחור מכל-ישראל וילך לבקש את-דוד ואנשיו על-פני צורי היעלים.
1SAM 24:4 ויבא אל-גדרות הצאן על-הדרך ושם מערה ויבא שאול להסך את-רגליו ודוד ואנשיו בירכתי המערה ישבים.
1SAM 24:5 ויאמרו אנשי דוד אליו הנה היום אשר-אמר יהוה אליך הנה אנכי נתן את-איביך בידך ועשית לו כאשר יטב בעיניך ויקם דוד ויכרת את-כנף- המעיל אשר-לשאול בלט.
1SAM 24:6 ויהי אחרי-כן ויך לב-דוד אתו על אשר כרת את-כנף אשר לשאול.
1SAM 24:7 ויאמר לאנשיו חלילה לי מיהוה אם-אעשה את-הדבר הזה לאדני למשיח יהוה לשלח ידי בו כי-משיח יהוה הוא.
1SAM 24:8 וישסע דוד את-אנשיו בדברים ולא נתנם לקום אל-שאול ושאול קם מהמערה וילך בדרך.
1SAM 24:9 ויקם דוד אחרי-כן ויצא מן-המערה ויקרא אחרי-שאול לאמר אדני המלך ויבט שאול אחריו ויקד דוד אפים ארצה וישתחו.
1SAM 24:10 ויאמר דוד לשאול למה תשמע את-דברי אדם לאמר הנה דוד מבקש רעתך.
1SAM 24:11 הנה היום הזה ראו עיניך את אשר-נתנך יהוה היום בידי במערה ואמר להרגך ותחס עליך ואמר לא-אשלח ידי באדני כי-משיח יהוה הוא.
1SAM 24:12 ואבי ראה גם ראה את-כנף מעילך בידי כי בכרתי את-כנף מעילך ולא הרגתיך דע וראה כי אין בידי רעה ופשע ולא-חטאתי לך ואתה צדה את- נפשי לקחתה.
1SAM 24:13 ישפט יהוה ביני ובינך ונקמני יהוה ממך וידי לא תהיה-בך.
1SAM 24:14 כאשר יאמר משל הקדמני מרשעים יצא רשע וידי לא תהיה-בך.
1SAM 24:15 אחרי מי יצא מלך ישראל אחרי מי אתה רדף אחרי כלב מת אחרי פרעש אחד.
1SAM 24:16 והיה יהוה לדין ושפט ביני ובינך וירא וירב את-ריבי וישפטני מידך.
1SAM 24:17 ויהי ככלות דוד לדבר את-הדברים האלה אל-שאול ויאמר שאול הקלך זה בני דוד וישא שאול קלו ויבך.
1SAM 24:18 ויאמר אל-דוד צדיק אתה ממני כי אתה גמלתני הטובה ואני גמלתיך הרעה.
1SAM 24:19 ואת הגדת היום את אשר-עשיתה אתי טובה את אשר סגרני יהוה בידך ולא הרגתני.
1SAM 24:20 וכי-ימצא איש את-איבו ושלחו בדרך טובה ויהוה ישלמך טובה תחת היום הזה אשר עשיתה לי.
1SAM 24:21 ועתה הנה ידעתי כי מלך תמלוך וקמה בידך ממלכת ישראל.
1SAM 24:22 ועתה השבעה לי ביהוה אם-תכרית את-זרעי אחרי ואם-תשמיד את-שמי מבית אבי.
1SAM 24:23 וישבע דוד לשאול וילך שאול אל-ביתו ודוד ואנשיו עלו על-המצודה.