EZEK 27:1 ויהי דבר-יהוה אלי לאמר.
EZEK 27:2 ואתה בן-אדם שא על-צר קינה.
EZEK 27:3 ואמרת לצור הישבתי על-מבואת ים רכלת העמים אל-איים רבים כה אמר אדני יהוה צור את אמרת אני כלילת יפי.
EZEK 27:4 בלב ימים גבוליך בניך כללו יפיך.
EZEK 27:5 ברושים משניר בנו לך את כל-לחתים ארז מלבנון לקחו לעשות תרן עליך.
EZEK 27:6 אלונים מבשן עשו משוטיך קרשך עשו-שן בת-אשרים מאיי כתים.
EZEK 27:7 שש-ברקמה ממצרים היה מפרשך להיות לך לנס תכלת וארגמן מאיי אלישה היה מכסך.
EZEK 27:8 ישבי צידון וארוד היו שטים לך חכמיך צור היו בך המה חבליך.
EZEK 27:9 זקני גבל וחכמיה היו בך מחזיקי בדקך כל-אניות הים ומלחיהם היו בך לערב מערבך.
EZEK 27:10 פרס ולוד ופוט היו בחילך אנשי מלחמתך מגן וכובע תלו-בך המה נתנו הדרך.
EZEK 27:11 בני ארוד וחילך על-חומותיך סביב וגמדים במגדלותיך היו שלטיהם תלו על-חומותיך סביב המה כללו יפיך.
EZEK 27:12 תרשיש סחרתך מרב כל-הון בכסף ברזל בדיל ועופרת נתנו עזבוניך.
EZEK 27:13 יון תבל ומשך המה רכליך בנפש אדם וכלי נחשת נתנו מערבך.
EZEK 27:14 מבית תוגרמה סוסים ופרשים ופרדים נתנו עזבוניך.
EZEK 27:15 בני דדן רכליך איים רבים סחרת ידך קרנות שן והובנים השיבו אשכרך.
EZEK 27:16 ארם סחרתך מרב מעשיך בנפך ארגמן ורקמה ובוץ וראמת וכדכד נתנו בעזבוניך.
EZEK 27:17 יהודה וארץ ישראל המה רכליך בחטי מנית ופנג ודבש ושמן וצרי נתנו מערבך.
EZEK 27:18 דמשק סחרתך ברב מעשיך מרב כל-הון ביין חלבון וצמר צחר.
EZEK 27:19 ודן ויון מאוזל בעזבוניך נתנו ברזל עשות קדה וקנה במערבך היה.
EZEK 27:20 דדן רכלתך בבגדי-חפש לרכבה.
EZEK 27:21 ערב וכל-נשיאי קדר המה סחרי ידך בכרים ואילים ועתודים בם סחריך.
EZEK 27:22 רכלי שבא ורעמה המה רכליך בראש כל-בשם ובכל-אבן יקרה וזהב נתנו עזבוניך.
EZEK 27:23 חרן וכנה ועדן רכלי שבא אשור כלמד רכלתך.
EZEK 27:24 המה רכליך במכללים בגלומי תכלת ורקמה ובגנזי ברמים בחבלים חבשים וארזים במרכלתך.
EZEK 27:25 אניות תרשיש שרותיך מערבך ותמלאי ותכבדי מאד בלב ימים.
EZEK 27:26 במים רבים הביאוך השטים אתך רוח הקדים שברך בלב ימים.
EZEK 27:27 הונך ועזבוניך מערבך מלחיך וחבליך מחזיקי בדקך וערבי מערבך וכל- אנשי מלחמתך אשר-בך ובכל-קהלך אשר בתוכך יפלו בלב ימים ביום מפלתך.
EZEK 27:28 לקול זעקת חבליך ירעשו מגרשות.
EZEK 27:29 וירדו מאניותיהם כל תפשי משוט מלחים כל חבלי הים אל-הארץ יעמדו.
EZEK 27:30 והשמיעו עליך בקולם ויזעקו מרה ויעלו עפר על-ראשיהם באפר יתפלשו.
EZEK 27:31 והקריחו אליך קרחה וחגרו שקים ובכו אליך במר-נפש מספד מר.
EZEK 27:32 ונשאו אליך בניהם קינה וקוננו עליך מי כצור כדמה בתוך הים.
EZEK 27:33 בצאת עזבוניך מימים השבעת עמים רבים ברב הוניך ומערביך העשרת מלכי-ארץ.
EZEK 27:34 עת נשברת מימים במעמקי-מים מערבך וכל-קהלך בתוכך נפלו.
EZEK 27:35 כל ישבי האיים שממו עליך ומלכיהם שערו שער רעמו פנים.
EZEK 27:36 סחרים בעמים שרקו עליך בלהות היית ואינך עד-עולם.