EZEK 30:1 ויהי דבר-יהוה אלי לאמר.
EZEK 30:2 בן-אדם הנבא ואמרת כה אמר אדני יהוה הילילו הה ליום.
EZEK 30:3 כי-קרוב יום וקרוב יום ליהוה יום ענן עת גוים יהיה.
EZEK 30:4 ובאה חרב במצרים והיתה חלחלה בכוש בנפל חלל במצרים ולקחו המונה ונהרסו יסודתיה.
EZEK 30:5 כוש ופוט ולוד וכל-הערב וכוב ובני ארץ הברית אתם בחרב יפלו.
EZEK 30:6 כה אמר יהוה ונפלו סמכי מצרים וירד גאון עזה ממגדל סונה בחרב יפלו-בה נאם אדני יהוה.
EZEK 30:7 ונשמו בתוך ארצות נשמות ועריו בתוך-ערים נחרבות תהיינה.
EZEK 30:8 וידעו כי-אני יהוה בתתי-אש במצרים ונשברו כל-עזריה.
EZEK 30:9 ביום ההוא יצאו מלאכים מלפני בצים להחריד את-כוש בטח והיתה חלחלה בהם ביום מצרים כי הנה באה.
EZEK 30:10 כה אמר אדני יהוה והשבתי את-המון מצרים ביד נבוכדראצר מלך-בבל.
EZEK 30:11 הוא ועמו אתו עריצי גוים מובאים לשחת הארץ והריקו חרבותם על- מצרים ומלאו את-הארץ חלל.
EZEK 30:12 ונתתי יארים חרבה ומכרתי את-הארץ ביד-רעים והשמתי ארץ ומלאה ביד-זרים אני יהוה דברתי.
EZEK 30:13 כה-אמר אדני יהוה והאבדתי גלולים והשבתי אלילים מנף ונשיא מארץ- מצרים לא יהיה-עוד ונתתי יראה בארץ מצרים.
EZEK 30:14 והשמתי את-פתרוס ונתתי אש בצען ועשיתי שפטים בנא.
EZEK 30:15 ושפכתי חמתי על-סין מעוז מצרים והכרתי את-המון נא.
EZEK 30:16 ונתתי אש במצרים חול תחיל סין ונא תהיה להבקע ונף צרי יומם.
EZEK 30:17 בחורי און ופי-בסת בחרב יפלו והנה בשבי תלכנה.
EZEK 30:18 ובתחפנחס חשך היום בשברי-שם את-מטות מצרים ונשבת-בה גאון עזה היא ענן יכסנה ובנותיה בשבי תלכנה.
EZEK 30:19 ועשיתי שפטים במצרים וידעו כי-אני יהוה.
EZEK 30:20 ויהי באחת עשרה שנה בראשון בשבעה לחדש היה דבר-יהוה אלי לאמר.
EZEK 30:21 בן-אדם את-זרוע פרעה מלך-מצרים שברתי והנה לא-חבשה לתת רפאות לשום חתול לחבשה לחזקה לתפש בחרב.
EZEK 30:22 לכן כה-אמר אדני יהוה הנני אל-פרעה מלך-מצרים ושברתי את-זרעתיו את-החזקה ואת-הנשברת והפלתי את-החרב מידו.
EZEK 30:23 והפצותי את-מצרים בגוים וזריתם בארצות.
EZEK 30:24 וחזקתי את-זרעות מלך בבל ונתתי את-חרבי בידו ושברתי את-זרעות פרעה ונאק נאקות חלל לפניו.
EZEK 30:25 והחזקתי את-זרעות מלך בבל וזרעות פרעה תפלנה וידעו כי-אני יהוה בתתי חרבי ביד מלך-בבל ונטה אותה אל-ארץ מצרים.
EZEK 30:26 והפצותי את-מצרים בגוים וזריתי אותם בארצות וידעו כי-אני יהוה.