1CHRON 24:1 ולבני אהרן מחלקותם בני אהרן נדב ואביהוא אלעזר ואיתמר.
1CHRON 24:2 וימת נדב ואביהוא לפני אביהם ובנים לא-היו להם ויכהנו אלעזר ואיתמר.
1CHRON 24:3 ויחלקם דויד וצדוק מן-בני אלעזר ואחימלך מן-בני איתמר לפקדתם בעבדתם.
1CHRON 24:4 וימצאו בני-אלעזר רבים לראשי הגברים מן-בני איתמר ויחלקום לבני אלעזר ראשים לבית-אבות ששה עשר ולבני איתמר לבית אבותם שמונה.
1CHRON 24:5 ויחלקום בגורלות אלה עם-אלה כי-היו שרי-קדש ושרי האלהים מבני אלעזר ובבני איתמר.
1CHRON 24:6 ויכתבם שמעיה בן-נתנאל הסופר מן-הלוי לפני המלך והשרים וצדוק הכהן ואחימלך בן-אביתר וראשי האבות לכהנים וללוים בית-אב אחד אחז לאלעזר ואחז אחז לאיתמר.
1CHRON 24:7 ויצא הגורל הראשון ליהויריב לידעיה השני.
1CHRON 24:8 לחרם השלישי לשערים הרבעי.
1CHRON 24:9 למלכיה החמישי למימן הששי.
1CHRON 24:10 להקוץ השבעי לאביה השמיני.
1CHRON 24:11 לישוע התשעי לשכניהו העשרי.
1CHRON 24:12 לאלישיב עשתי עשר ליקים שנים עשר.
1CHRON 24:13 לחפה שלשה עשר לישבאב ארבעה עשר.
1CHRON 24:14 לבלגה חמשה עשר לאמר ששה עשר.
1CHRON 24:15 לחזיר שבעה עשר להפצץ שמונה עשר.
1CHRON 24:16 לפתחיה תשעה עשר ליחזקאל העשרים.
1CHRON 24:17 ליכין אחד ועשרים לגמול שנים ועשרים.
1CHRON 24:18 לדליהו שלשה ועשרים למעזיהו ארבעה ועשרים.
1CHRON 24:19 אלה פקדתם לעבדתם לבוא לבית-יהוה כמשפטם ביד אהרן אביהם כאשר צוהו יהוה אלהי ישראל.
1CHRON 24:20 ולבני לוי הנותרים לבני עמרם שובאל לבני שובאל יחדיהו.
1CHRON 24:21 לרחביהו לבני רחביהו הראש ישיה.
1CHRON 24:22 ליצהרי שלמות לבני שלמות יחת.
1CHRON 24:23 ובני יריהו אמריהו השני יחזיאל השלישי יקמעם הרביעי.
1CHRON 24:24 בני עזיאל מיכה לבני מיכה שמור.
1CHRON 24:25 אחי מיכה ישיה לבני ישיה זכריהו.
1CHRON 24:26 בני מררי מחלי ומושי בני יעזיהו בנו.
1CHRON 24:27 בני מררי ליעזיהו בנו ושהם וזכור ועברי.
1CHRON 24:28 למחלי אלעזר ולא-היה לו בנים.
1CHRON 24:29 לקיש בני-קיש ירחמאל.
1CHRON 24:30 ובני מושי מחלי ועדר וירימות אלה בני הלוים לבית אבתיהם.
1CHRON 24:31 ויפילו גם-הם גורלות לעמת אחיהם בני-אהרן לפני דויד המלך וצדוק ואחימלך וראשי האבות לכהנים וללוים אבות הראש לעמת אחיו הקטן.