IS 29:1 הוי אריאל אריאל קרית חנה דוד ספו שנה על-שנה חגים ינקפו.
IS 29:2 והציקותי לאריאל והיתה תאניה ואניה והיתה לי כאריאל.
IS 29:3 וחניתי כדור עליך וצרתי עליך מצב והקימתי עליך מצרת.
IS 29:4 ושפלת מארץ תדברי ומעפר תשח אמרתך והיה כאוב מארץ קולך ומעפר אמרתך תצפצף.
IS 29:5 והיה כאבק דק המון זריך וכמץ עבר המון עריצים והיה לפתע פתאם.
IS 29:6 מעם יהוה צבאות תפקד ברעם וברעש וקול גדול סופה וסערה ולהב אש אוכלה.
IS 29:7 והיה כחלום חזון לילה המון כל-הגוים הצבאים על-אריאל וכל-צביה ומצדתה והמציקים לה.
IS 29:8 והיה כאשר יחלם הרעב והנה אוכל והקיץ וריקה נפשו וכאשר יחלם הצמא והנה שתה והקיץ והנה עיף ונפשו שוקקה כן יהיה המון כל-הגוים הצבאים על-הר ציון.
IS 29:9 התמהמהו ותמהו השתעשעו ושעו שכרו ולא-יין נעו ולא שכר.
IS 29:10 כי-נסך עליכם יהוה רוח תרדמה ויעצם את-עיניכם את-הנביאים ואת- ראשיכם החזים כסה.
IS 29:11 ותהי לכם חזות הכל כדברי הספר החתום אשר-יתנו אתו אל-יודע הספר לאמר קרא נא-זה ואמר לא אוכל כי חתום הוא.
IS 29:12 ונתן הספר על אשר לא-ידע ספר לאמר קרא נא-זה ואמר לא ידעתי ספר.
IS 29:13 ויאמר אדני יען כי נגש העם הזה בפיו ובשפתיו כבדוני ולבו רחק ממני ותהי יראתם אתי מצות אנשים מלמדה.
IS 29:14 לכן הנני יוסף להפליא את-העם-הזה הפלא ופלא ואבדה חכמת חכמיו ובינת נבניו תסתתר.
IS 29:15 הוי המעמיקים מיהוה לסתר עצה והיה במחשך מעשיהם ויאמרו מי ראנו ומי יודענו.
IS 29:16 הפככם אם-כחמר היצר יחשב כי-יאמר מעשה לעשהו לא עשני ויצר אמר ליוצרו לא הבין.
IS 29:17 הלוא-עוד מעט מזער ושב לבנון לכרמל והכרמל ליער יחשב.
IS 29:18 ושמעו ביום-ההוא החרשים דברי-ספר ומאפל ומחשך עיני עורים תראינה.
IS 29:19 ויספו ענוים ביהוה שמחה ואביוני אדם בקדוש ישראל יגילו.
IS 29:20 כי-אפס עריץ וכלה לץ ונכרתו כל-שקדי און.
IS 29:21 מחטיאי אדם בדבר ולמוכיח בשער יקשון ויטו בתהו צדיק.
IS 29:22 לכן כה-אמר יהוה אל-בית יעקב אשר פדה את-אברהם לא-עתה יבוש יעקב ולא עתה פניו יחורו.
IS 29:23 כי בראתו ילדיו מעשה ידי בקרבו יקדישו שמי והקדישו את-קדוש יעקב ואת-אלהי ישראל יעריצו.
IS 29:24 וידעו תעי-רוח בינה ורוגנים ילמדו-לקח.