IS 60:1 קומי אורי כי בא אורך וכבוד יהוה עליך זרח.
IS 60:2 כי-הנה החשך יכסה-ארץ וערפל לאמים ועליך יזרח יהוה וכבודו עליך יראה.
IS 60:3 והלכו גוים לאורך ומלכים לנגה זרחך.
IS 60:4 שאי-סביב עיניך וראי כלם נקבצו באו-לך בניך מרחוק יבאו ובנתיך על-צד תאמנה.
IS 60:5 אז תראי ונהרת ופחד ורחב לבבך כי-יהפך עליך המון ים חיל גוים יבאו לך.
IS 60:6 שפעת גמלים תכסך בכרי מדין ועיפה כלם משבא יבאו זהב ולבונה ישאו ותהלת יהוה יבשרו.
IS 60:7 כל-צאן קדר יקבצו לך אילי נביות ישרתונך יעלו על-רצון מזבחי ובית תפארתי אפאר.
IS 60:8 מי-אלה כעב תעופינה וכיונים אל-ארבתיהם.
IS 60:9 כי-לי איים יקוו ואניות תרשיש בראשנה להביא בניך מרחוק כספם וזהבם אתם לשם יהוה אלהיך ולקדוש ישראל כי פארך.
IS 60:10 ובנו בני-נכר חמתיך ומלכיהם ישרתונך כי בקצפי הכיתיך וברצוני רחמתיך.
IS 60:11 ופתחו שעריך תמיד יומם ולילה לא יסגרו להביא אליך חיל גוים ומלכיהם נהוגים.
IS 60:12 כי-הגוי והממלכה אשר לא-יעבדוך יאבדו והגוים חרב יחרבו.
IS 60:13 כבוד הלבנון אליך יבוא ברוש תדהר ותאשור יחדו לפאר מקום מקדשי ומקום רגלי אכבד.
IS 60:14 והלכו אליך שחוח בני מעניך והשתחוו על-כפות רגליך כל-מנאציך וקראו לך עיר יהוה ציון קדוש ישראל.
IS 60:15 תחת היותך עזובה ושנואה ואין עובר ושמתיך לגאון עולם משוש דור ודור.
IS 60:16 וינקת חלב גוים ושד מלכים תינקי וידעת כי אני יהוה מושיעך וגאלך אביר יעקב.
IS 60:17 תחת הנחשת אביא זהב ותחת הברזל אביא כסף ותחת העצים נחשת ותחת האבנים ברזל ושמתי פקדתך שלום ונגשיך צדקה.
IS 60:18 לא-ישמע עוד חמס בארצך שד ושבר בגבוליך וקראת ישועה חומתיך ושעריך תהלה.
IS 60:19 לא-יהיה-לך עוד השמש לאור יומם ולנגה הירח לא-יאיר לך והיה-לך יהוה לאור עולם ואלהיך לתפארתך.
IS 60:20 לא-יבוא עוד שמשך וירחך לא יאסף כי יהוה יהיה-לך לאור עולם ושלמו ימי אבלך.
IS 60:21 ועמך כלם צדיקים לעולם יירשו ארץ נצר מטעו מעשה ידי להתפאר.
IS 60:22 הקטן יהיה לאלף והצעיר לגוי עצום אני יהוה בעתה אחישנה.