IS 65:1 נדרשתי ללוא שאלו נמצאתי ללא בקשני אמרתי הנני הנני אל-גוי לא- קרא בשמי.
IS 65:2 פרשתי ידי כל-היום אל-עם סורר ההלכים הדרך לא-טוב אחר מחשבתיהם.
IS 65:3 העם המכעיסים אותי על-פני תמיד זבחים בגנות ומקטרים על-הלבנים.
IS 65:4 הישבים בקברים ובנצורים ילינו האכלים בשר החזיר ופרק פגלים כליהם.
IS 65:5 האמרים קרב אליך אל-תגש-בי כי קדשתיך אלה עשן באפי אש יקדת כל- היום.
IS 65:6 הנה כתובה לפני לא אחשה כי אם-שלמתי ושלמתי על-חיקם.
IS 65:7 עונתיכם ועונת אבותיכם יחדו אמר יהוה אשר קטרו על-ההרים ועל- הגבעות חרפוני ומדתי פעלתם ראשנה על-חיקם.
IS 65:8 כה אמר יהוה כאשר ימצא התירוש באשכול ואמר אל-תשחיתהו כי ברכה בו כן אעשה למען עבדי לבלתי השחית הכל.
IS 65:9 והוצאתי מיעקב זרע ומיהודה יורש הרי וירשוה בחירי ועבדי ישכנו- שמה.
IS 65:10 והיה השרון לנוה-צאן ועמק עכור לרבץ בקר לעמי אשר דרשוני.
IS 65:11 ואתם עזבי יהוה השכחים את-הר קדשי הערכים לגד שלחן והממלאים למני ממסך.
IS 65:12 ומניתי אתכם לחרב וכלכם לטבח תכרעו יען קראתי ולא עניתם דברתי ולא שמעתם ותעשו הרע בעיני ובאשר לא-חפצתי בחרתם.
IS 65:13 לכן כה-אמר אדני יהוה הנה עבדי יאכלו ואתם תרעבו הנה עבדי ישתו ואתם תצמאו הנה עבדי ישמחו ואתם תבשו.
IS 65:14 הנה עבדי ירנו מטוב לב ואתם תצעקו מכאב לב ומשבר רוח תילילו.
IS 65:15 והנחתם שמכם לשבועה לבחירי והמיתך אדני יהוה ולעבדיו יקרא שם אחר.
IS 65:16 אשר המתברך בארץ יתברך באלהי אמן והנשבע בארץ ישבע באלהי אמן כי נשכחו הצרות הראשנות וכי נסתרו מעיני.
IS 65:17 כי-הנני בורא שמים חדשים וארץ חדשה ולא תזכרנה הראשנות ולא תעלינה על-לב.
IS 65:18 כי-אם-שישו וגילו עדי-עד אשר אני בורא כי הנני בורא את-ירושלם גילה ועמה משוש.
IS 65:19 וגלתי בירושלם וששתי בעמי ולא-ישמע בה עוד קול בכי וקול זעקה.
IS 65:20 לא-יהיה משם עוד עול ימים וזקן אשר לא-ימלא את-ימיו כי הנער בן- מאה שנה ימות והחוטא בן-מאה שנה יקלל.
IS 65:21 ובנו בתים וישבו ונטעו כרמים ואכלו פרים.
IS 65:22 לא יבנו ואחר ישב לא יטעו ואחר יאכל כי-כימי העץ ימי עמי ומעשה ידיהם יבלו בחירי.
IS 65:23 לא ייגעו לריק ולא ילדו לבהלה כי זרע ברוכי יהוה המה וצאצאיהם אתם.
IS 65:24 והיה טרם-יקראו ואני אענה עוד הם מדברים ואני אשמע.
IS 65:25 זאב וטלה ירעו כאחד ואריה כבקר יאכל-תבן ונחש עפר לחמו לא-ירעו ולא-ישחיתו בכל-הר קדשי אמר יהוה.