IS 59:1 הן לא-קצרה יד-יהוה מהושיע ולא-כבדה אזנו משמוע.
IS 59:2 כי אם-עונתיכם היו מבדלים בינכם לבין אלהיכם וחטאותיכם הסתירו פנים מכם משמוע.
IS 59:3 כי כפיכם נגאלו בדם ואצבעותיכם בעון שפתותיכם דברו-שקר לשונכם עולה תהגה.
IS 59:4 אין-קרא בצדק ואין נשפט באמונה בטוח על-תהו ודבר-שוא הרו עמל והוליד און.
IS 59:5 ביצי צפעוני בקעו וקורי עכביש יארגו האכל מביציהם ימות והזורה תבקע אפעה.
IS 59:6 קוריהם לא-יהיו לבגד ולא יתכסו במעשיהם מעשיהם מעשי-און ופעל חמס בכפיהם.
IS 59:7 רגליהם לרע ירצו וימהרו לשפך דם נקי מחשבותיהם מחשבות און שד ושבר במסלותם.
IS 59:8 דרך שלום לא ידעו ואין משפט במעגלותם נתיבותיהם עקשו להם כל דרך בה לא ידע שלום.
IS 59:9 על-כן רחק משפט ממנו ולא תשיגנו צדקה נקוה לאור והנה-חשך לנגהות באפלות נהלך.
IS 59:10 נגששה כעורים קיר וכאין עינים נגששה כשלנו בצהרים כנשף באשמנים כמתים.
IS 59:11 נהמה כדבים כלנו וכיונים הגה נהגה נקוה למשפט ואין לישועה רחקה ממנו.
IS 59:12 כי-רבו פשעינו נגדך וחטאותינו ענתה בנו כי-פשעינו אתנו ועונתינו ידענום.
IS 59:13 פשע וכחש ביהוה ונסוג מאחר אלהינו דבר-עשק וסרה הרו והגו מלב דברי-שקר.
IS 59:14 והסג אחור משפט וצדקה מרחוק תעמד כי-כשלה ברחוב אמת ונכחה לא- תוכל לבוא.
IS 59:15 ותהי האמת נעדרת וסר מרע משתולל וירא יהוה וירע בעיניו כי-אין משפט.
IS 59:16 וירא כי-אין איש וישתומם כי אין מפגיע ותושע לו זרעו וצדקתו היא סמכתהו.
IS 59:17 וילבש צדקה כשרין וכובע ישועה בראשו וילבש בגדי נקם תלבשת ויעט כמעיל קנאה.
IS 59:18 כעל גמלות כעל ישלם חמה לצריו גמול לאיביו לאיים גמול ישלם.
IS 59:19 וייראו ממערב את-שם יהוה וממזרח-שמש את-כבודו כי-יבוא כנהר צר רוח יהוה נססה בו.
IS 59:20 ובא לציון גואל ולשבי פשע ביעקב נאם יהוה.
IS 59:21 ואני זאת בריתי אותם אמר יהוה רוחי אשר עליך ודברי אשר-שמתי בפיך לא-ימושו מפיך ומפי זרעך ומפי זרע זרעך אמר יהוה מעתה ועד- עולם.