IS 43:1 ועתה כה-אמר יהוה בראך יעקב ויצרך ישראל אל-תירא כי גאלתיך קראתי בשמך לי-אתה.
IS 43:2 כי-תעבר במים אתך-אני ובנהרות לא ישטפוך כי-תלך במו-אש לא תכוה ולהבה לא תבער-בך.
IS 43:3 כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך.
IS 43:4 מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך.
IS 43:5 אל-תירא כי אתך-אני ממזרח אביא זרעך וממערב אקבצך.
IS 43:6 אמר לצפון תני ולתימן אל-תכלאי הביאי בני מרחוק ובנותי מקצה הארץ.
IS 43:7 כל הנקרא בשמי ולכבודי בראתיו יצרתיו אף-עשיתיו.
IS 43:8 הוציא עם-עור ועינים יש וחרשים ואזנים למו.
IS 43:9 כל-הגוים נקבצו יחדו ויאספו לאמים מי בהם יגיד זאת וראשנות ישמיענו יתנו עדיהם ויצדקו וישמעו ויאמרו אמת.
IS 43:10 אתם עדי נאם-יהוה ועבדי אשר בחרתי למען תדעו ותאמינו לי ותבינו כי-אני הוא לפני לא-נוצר אל ואחרי לא יהיה.
IS 43:11 אנכי אנכי יהוה ואין מבלעדי מושיע.
IS 43:12 אנכי הגדתי והושעתי והשמעתי ואין בכם זר ואתם עדי נאם-יהוה ואני-אל.
IS 43:13 גם-מיום אני הוא ואין מידי מציל אפעל ומי ישיבנה.
IS 43:14 כה-אמר יהוה גאלכם קדוש ישראל למענכם שלחתי בבלה והורדתי בריחים כלם וכשדים באניות רנתם.
IS 43:15 אני יהוה קדושכם בורא ישראל מלככם.
IS 43:16 כה אמר יהוה הנותן בים דרך ובמים עזים נתיבה.
IS 43:17 המוציא רכב-וסוס חיל ועזוז יחדו ישכבו בל-יקומו דעכו כפשתה כבו.
IS 43:18 אל-תזכרו ראשנות וקדמניות אל-תתבננו.
IS 43:19 הנני עשה חדשה עתה תצמח הלוא תדעוה אף אשים במדבר דרך בישמון נהרות.
IS 43:20 תכבדני חית השדה תנים ובנות יענה כי-נתתי במדבר מים נהרות aiyino להשקות עמי בחירי.
IS 43:21 עם-זו יצרתי לי תהלתי יספרו.
IS 43:22 ולא-אתי קראת יעקב כי-יגעת בי ישראל.
IS 43:23 לא-הביאת לי שה עלתיך וזבחיך לא כבדתני לא העבדתיך במנחה ולא הוגעתיך בלבונה.
IS 43:24 לא-קנית לי בכסף קנה וחלב זבחיך לא הרויתני אך העבדתני בחטאותיך הוגעתני בעונתיך.
IS 43:25 אנכי אנכי הוא מחה פשעיך למעני וחטאתיך לא אזכר.
IS 43:26 הזכירני נשפטה יחד ספר אתה למען תצדק.
IS 43:27 אביך הראשון חטא ומליציך פשעו בי.
IS 43:28 ואחלל שרי קדש ואתנה לחרם יעקב וישראל לגדופים.