IS 30:1 הוי בנים סוררים נאם-יהוה לעשות עצה ולא מני ולנסך מסכה ולא רוחי למען ספות חטאת על-חטאת.
IS 30:2 ההלכים לרדת מצרים ופי לא שאלו לעוז במעוז פרעה ולחסות בצל מצרים.
IS 30:3 והיה לכם מעוז פרעה לבשת והחסות בצל-מצרים לכלמה.
IS 30:4 כי-היו בצען שריו ומלאכיו חנס יגיעו.
IS 30:5 כל הבאיש על-עם לא-יועילו למו לא לעזר ולא להועיל כי לבשת וגם- לחרפה.
IS 30:6 משא בהמות נגב בארץ צרה וצוקה לביא וליש מהם אפעה ושרף מעופף ישאו על-כתף עירים חילהם ועל-דבשת גמלים אוצרתם על-עם לא יועילו.
IS 30:7 ומצרים הבל וריק יעזרו לכן קראתי לזאת רהב הם שבת.
IS 30:8 עתה בוא כתבה על-לוח אתם ועל-ספר חקה ותהי ליום אחרון לעד עד- עולם.
IS 30:9 כי עם מרי הוא בנים כחשים בנים לא-אבו שמוע תורת יהוה.
IS 30:10 אשר אמרו לראים לא תראו ולחזים לא תחזו-לנו נכחות דברו-לנו חלקות חזו מהתלות.
IS 30:11 סורו מני-דרך הטו מני-ארח השביתו מפנינו את-קדוש ישראל.
IS 30:12 לכן כה אמר קדוש ישראל יען מאסכם בדבר הזה ותבטחו בעשק ונלוז ותשענו עליו.
IS 30:13 לכן יהיה לכם העון הזה כפרץ נפל נבעה בחומה נשגבה אשר-פתאם לפתע יבוא שברה.
IS 30:14 ושברה כשבר נבל יוצרים כתות לא יחמל ולא-ימצא במכתתו חרש לחתות אש מיקוד ולחשף מים מגבא.
IS 30:15 כי כה-אמר אדני יהוה קדוש ישראל בשובה ונחת תושעון בהשקט ובבטחה תהיה גבורתכם ולא אביתם.
IS 30:16 ותאמרו לא-כי על-סוס ננוס על-כן תנוסון ועל-קל נרכב על-כן יקלו רדפיכם.
IS 30:17 אלף אחד מפני גערת אחד מפני גערת חמשה תנסו עד אם-נותרתם כתרן על-ראש ההר וכנס על-הגבעה.
IS 30:18 ולכן יחכה יהוה לחננכם ולכן ירום לרחמכם כי-אלהי משפט יהוה אשרי כל-חוכי לו.
IS 30:19 כי-עם בציון ישב בירושלם בכו לא-תבכה חנון יחנך לקול זעקך כשמעתו ענך.
IS 30:20 ונתן לכם אדני לחם צר ומים לחץ ולא-יכנף עוד מוריך והיו עיניך ראות את-מוריך.
IS 30:21 ואזניך תשמענה דבר מאחריך לאמר זה הדרך לכו בו כי תאמינו וכי תשמאילו.
IS 30:22 וטמאתם את-צפוי פסילי כספך ואת-אפדת מסכת זהבך תזרם כמו דוה צא תאמר לו.
IS 30:23 ונתן מטר זרעך אשר-תזרע את-האדמה ולחם תבואת האדמה והיה דשן ושמן ירעה מקניך ביום ההוא כר נרחב.
IS 30:24 והאלפים והעירים עבדי האדמה בליל חמיץ יאכלו אשר-זרה ברחת ובמזרה.
IS 30:25 והיה על-כל-הר גבה ועל כל-גבעה נשאה פלגים יבלי-מים ביום הרג רב בנפל מגדלים.
IS 30:26 והיה אור-הלבנה כאור החמה ואור החמה יהיה שבעתים כאור שבעת הימים ביום חבש יהוה את-שבר עמו ומחץ מכתו ירפא.
IS 30:27 הנה שם-יהוה בא ממרחק בער אפו וכבד משאה שפתיו מלאו זעם ולשונו כאש אכלת.
IS 30:28 ורוחו כנחל שוטף עד-צואר יחצה להנפה גוים בנפת שוא ורסן מתעה על לחיי עמים.
IS 30:29 השיר יהיה לכם כליל התקדש-חג ושמחת לבב כהולך בחליל לבוא בהר- יהוה אל-צור ישראל.
IS 30:30 והשמיע יהוה את-הוד קולו ונחת זרועו יראה בזעף אף ולהב אש אוכלה נפץ וזרם ואבן ברד.
IS 30:31 כי-מקול יהוה יחת אשור בשבט יכה.
IS 30:32 והיה כל מעבר מטה מוסדה אשר יניח יהוה עליו בתפים ובכנרות ובמלחמות תנופה נלחם-בה.
IS 30:33 כי-ערוך מאתמול תפתה גם-הוא למלך הוכן העמיק הרחב מדרתה אש ועצים הרבה נשמת יהוה כנחל גפרית בערה בה.