IS 57:1 הצדיק אבד ואין איש שם על-לב ואנשי-חסד נאספים באין מבין כי- מפני הרעה נאסף הצדיק.
IS 57:2 יבוא שלום ינוחו על-משכבותם הלך נכחו.
IS 57:3 ואתם קרבו-הנה בני עננה זרע מנאף ותזנה.
IS 57:4 על-מי תתענגו על-מי תרחיבו פה תאריכו לשון הלוא-אתם ילדי-פשע זרע שקר.
IS 57:5 הנחמים באלים תחת כל-עץ רענן שחטי הילדים בנחלים תחת סעפי הסלעים.
IS 57:6 בחלקי-נחל חלקך הם הם גורלך גם-להם שפכת נסך העלית מנחה העל אלה אנחם.
IS 57:7 על הר-גבה ונשא שמת משכבך גם-שם עלית לזבח זבח.
IS 57:8 ואחר הדלת והמזוזה שמת זכרונך כי מאתי גלית ותעלי הרחבת משכבך ותכרת-לך מהם אהבת משכבם יד חזית.
IS 57:9 ותשרי למלך בשמן ותרבי רקחיך ותשלחי צריך עד-מרחק ותשפילי עד- שאול.
IS 57:10 ברב דרכך יגעת לא אמרת נואש חית ידך מצאת על-כן לא חלית.
IS 57:11 ואת-מי דאגת ותיראי כי תכזבי ואותי לא זכרת לא-שמת על-לבך הלא אני מחשה ומעלם ואותי לא תיראי.
IS 57:12 אני אגיד צדקתך ואת-מעשיך ולא יועילוך.
IS 57:13 בזעקך יצילך קבוציך ואת-כלם ישא-רוח יקח-הבל והחוסה בי ינחל- ארץ ויירש הר-קדשי.
IS 57:14 ואמר סלו-סלו פנו-דרך הרימו מכשול מדרך עמי.
IS 57:15 כי כה אמר רם ונשא שכן עד וקדוש שמו מרום וקדוש אשכון ואת-דכא ושפל-רוח להחיות רוח שפלים ולהחיות לב נדכאים.
IS 57:16 כי לא לעולם אריב ולא לנצח אקצוף כי-רוח מלפני יעטוף ונשמות אני עשיתי.
IS 57:17 בעון בצעו קצפתי ואכהו הסתר ואקצף וילך שובב בדרך לבו.
IS 57:18 דרכיו ראיתי וארפאהו ואנחהו ואשלם נחמים לו ולאבליו.
IS 57:19 בורא נוב שפתים שלום שלום לרחוק ולקרוב אמר יהוה ורפאתיו.
IS 57:20 והרשעים כים נגרש כי השקט לא יוכל ויגרשו מימיו רפש וטיט.
IS 57:21 אין שלום אמר אלהי לרשעים.