Back to Hebrew Bible online homepage (Contents Page of Online Bible)
2 Chronicles 29 [1]
[2]
[3]
[4]
[5]
[6]
[7]
[8]
[9]
[10]
[11]
[12]
[13]
[14]
[15]
[16]
[17]
[18]
[19]
[20]
[21]
[22]
[23]
[24]
[25]
[26]
[27]
[28]
[29]
[30]
[31]
[32]
[33]
[34]
[35]
[36]
2CHRON 29:1 יחזקיהו מלך בן-עשרים וחמש שנה ועשרים ותשע שנה מלך בירושלם ושם אמו אביה בת-זכריהו.
2CHRON 29:2 ויעש הישר בעיני יהוה ככל אשר-עשה דויד אביו.
2CHRON 29:3 הוא בשנה הראשונה למלכו בחדש הראשון פתח את-דלתות בית-יהוה ויחזקם.
2CHRON 29:4 ויבא את-הכהנים ואת-הלוים ויאספם לרחוב המזרח.
2CHRON 29:5 ויאמר להם שמעוני הלוים עתה התקדשו וקדשו את-בית יהוה אלהי אבתיכם והוציאו את-הנדה מן-הקדש.
2CHRON 29:6 כי-מעלו אבתינו ועשו הרע בעיני יהוה-אלהינו ויעזבהו ויסבו פניהם ממשכן יהוה ויתנו-ערף.
2CHRON 29:7 גם סגרו דלתות האולם ויכבו את-הנרות וקטרת לא הקטירו ועלה לא- העלו בקדש לאלהי ישראל.
2CHRON 29:8 ויהי קצף יהוה על-יהודה וירושלם ויתנם לזועה לשמה ולשרקה כאשר אתם ראים בעיניכם.
2CHRON 29:9 והנה נפלו אבותינו בחרב ובנינו ובנותינו ונשינו בשבי על-זאת.
2CHRON 29:10 עתה עם-לבבי לכרות ברית ליהוה אלהי ישראל וישב ממנו חרון אפו.
2CHRON 29:11 בני עתה אל-תשלו כי-בכם בחר יהוה לעמד לפניו לשרתו ולהיות לו משרתים ומקטרים.
2CHRON 29:12 ויקמו הלוים מחת בן-עמשי ויואל בן-עזריהו מן-בני הקהתי ומן-בני מררי קיש בן-עבדי ועזריהו בן-יהללאל ומן-הגרשני יואח בן-זמה ועדן בן-יואח.
2CHRON 29:13 ומן-בני אליצפן שמרי ויעואל ומן-בני אסף זכריהו ומתניהו.
2CHRON 29:14 ומן-בני הימן יחואל ושמעי ומן-בני ידותון שמעיה ועזיאל.
2CHRON 29:15 ויאספו את-אחיהם ויתקדשו ויבאו כמצות-המלך בדברי יהוה לטהר בית יהוה.
2CHRON 29:16 ויבאו הכהנים לפנימה בית-יהוה לטהר ויוציאו את כל-הטמאה אשר מצאו בהיכל יהוה לחצר בית יהוה ויקבלו הלוים להוציא לנחל-קדרון חוצה.
2CHRON 29:17 ויחלו באחד לחדש הראשון לקדש וביום שמונה לחדש באו לאולם יהוה ויקדשו את-בית-יהוה לימים שמונה וביום ששה עשר לחדש הראשון כלו.
2CHRON 29:18 ויבואו פנימה אל-חזקיהו המלך ויאמרו טהרנו את-כל-בית יהוה את- מזבח העולה ואת-כל-כליו ואת-שלחן המערכת ואת-כל-כליו.
2CHRON 29:19 ואת כל-הכלים אשר הזניח המלך אחז במלכותו במעלו הכנו והקדשנו והנם לפני מזבח יהוה.
2CHRON 29:20 וישכם יחזקיהו המלך ויאסף את שרי העיר ויעל בית יהוה.
2CHRON 29:21 ויביאו פרים-שבעה ואילים שבעה וכבשים שבעה וצפירי עזים שבעה לחטאת על-הממלכה ועל-המקדש ועל-יהודה ויאמר לבני אהרן הכהנים להעלות על-מזבח יהוה.
2CHRON 29:22 וישחטו הבקר ויקבלו הכהנים את-הדם ויזרקו המזבחה וישחטו האלים ויזרקו הדם המזבחה וישחטו הכבשים ויזרקו הדם המזבחה.
2CHRON 29:23 ויגישו את-שעירי החטאת לפני המלך והקהל ויסמכו ידיהם עליהם.
2CHRON 29:24 וישחטום הכהנים ויחטאו את-דמם המזבחה לכפר על-כל-ישראל כי לכל- ישראל אמר המלך העולה והחטאת.
2CHRON 29:25 ויעמד את-הלוים בית יהוה במצלתים בנבלים ובכנרות במצות דויד וגד חזה-המלך ונתן הנביא כי ביד-יהוה המצוה ביד-נביאיו.
2CHRON 29:26 ויעמדו הלוים בכלי דויד והכהנים בחצצרות.
2CHRON 29:27 ויאמר חזקיהו להעלות העלה להמזבח ובעת החל העולה החל שיר-יהוה והחצצרות ועל-ידי כלי דויד מלך-ישראל.
2CHRON 29:28 וכל-הקהל משתחוים והשיר משורר והחצצרות מחצצרים הכל עד לכלות העלה.
2CHRON 29:29 וככלות להעלות כרעו המלך וכל-הנמצאים אתו וישתחוו.
2CHRON 29:30 ויאמר יחזקיהו המלך והשרים ללוים להלל ליהוה בדברי דויד ואסף החזה ויהללו עד-לשמחה ויקדו וישתחוו.
2CHRON 29:31 ויען יחזקיהו ויאמר עתה מלאתם ידכם ליהוה גשו והביאו זבחים ותודות לבית יהוה ויביאו הקהל זבחים ותודות וכל-נדיב לב עלות.
2CHRON 29:32 ויהי מספר העלה אשר הביאו הקהל בקר שבעים אילים מאה כבשים מאתים לעלה ליהוה כל-אלה.
2CHRON 29:33 והקדשים בקר שש מאות וצאן שלשת אלפים.
2CHRON 29:34 רק הכהנים היו למעט ולא יכלו להפשיט את-כל-העלות ויחזקום אחיהם הלוים עד-כלות המלאכה ועד יתקדשו הכהנים כי הלוים ישרי לבב להתקדש מהכהנים.
2CHRON 29:35 וגם-עלה לרב בחלבי השלמים ובנסכים לעלה ותכון עבודת בית-יהוה.
2CHRON 29:36 וישמח יחזקיהו וכל-העם על ההכין האלהים לעם כי בפתאם היה הדבר.
Search the online bible
Back to Jesus Work Ministry main home page
Back to Jesus Work Ministry home for spiritual warfare and Christian deliverance ministry
Back to Jesus Work Ministry home for resources on Christian living
Christian deliverance and Spiritual warfare book 1
Christian deliverance and Spiritual warfare book 2
Christian deliverance and Spiritual warfare book 3
Christian deliverance and Spiritual warfare book 4
Spiritual warfare and Christian deliverance ministry classics
Other spiritual warfare and Christian deliverance resources on Jesus Work Ministry
Christian deliverance and spiritual warfare audio sermons (free Christian MP3 audio downloads)