2CHRON 30:1 וישלח יחזקיהו על-כל-ישראל ויהודה וגם-אגרות כתב על-אפרים ומנשה לבוא לבית-יהוה בירושלם לעשות פסח ליהוה אלהי ישראל.
2CHRON 30:2 ויועץ המלך ושריו וכל-הקהל בירושלם לעשות הפסח בחדש השני.
2CHRON 30:3 כי לא יכלו לעשתו בעת ההיא כי הכהנים לא-התקדשו למדי והעם לא- נאספו לירושלם.
2CHRON 30:4 ויישר הדבר בעיני המלך ובעיני כל-הקהל.
2CHRON 30:5 ויעמידו דבר להעביר קול בכל-ישראל מבאר-שבע ועד-דן לבוא לעשות פסח ליהוה אלהי-ישראל בירושלם כי לא לרב עשו ככתוב.
2CHRON 30:6 וילכו הרצים באגרות מיד המלך ושריו בכל-ישראל ויהודה וכמצות המלך לאמר בני ישראל שובו אל-יהוה אלהי אברהם יצחק וישראל וישב אל- הפליטה הנשארת לכם מכף מלכי אשור.
2CHRON 30:7 ואל-תהיו כאבותיכם וכאחיכם אשר מעלו ביהוה אלהי אבותיהם ויתנם לשמה כאשר אתם ראים.
2CHRON 30:8 עתה אל-תקשו ערפכם כאבותיכם תנו-יד ליהוה ובאו למקדשו אשר הקדיש לעולם ועבדו את-יהוה אלהיכם וישב מכם חרון אפו.
2CHRON 30:9 כי בשובכם על-יהוה אחיכם ובניכם לרחמים לפני שוביהם ולשוב לארץ הזאת כי-חנון ורחום יהוה אלהיכם ולא-יסיר פנים מכם אם-תשובו אליו.
2CHRON 30:10 ויהיו הרצים עברים מעיר לעיר בארץ-אפרים ומנשה ועד-זבלון ויהיו משחיקים עליהם ומלעגים בם.
2CHRON 30:11 אך-אנשים מאשר ומנשה ומזבלון נכנעו ויבאו לירושלם.
2CHRON 30:12 גם ביהודה היתה יד האלהים לתת להם לב אחד לעשות מצות המלך והשרים בדבר יהוה.
2CHRON 30:13 ויאספו ירושלם עם-רב לעשות את-חג המצות בחדש השני קהל לרב מאד.
2CHRON 30:14 ויקמו ויסירו את-המזבחות אשר בירושלם ואת כל-המקטרות הסירו וישליכו לנחל קדרון.
2CHRON 30:15 וישחטו הפסח בארבעה עשר לחדש השני והכהנים והלוים נכלמו ויתקדשו ויביאו עלות בית יהוה.
2CHRON 30:16 ויעמדו על-עמדם כמשפטם כתורת משה איש-האלהים הכהנים זרקים את- הדם מיד הלוים.
2CHRON 30:17 כי-רבת בקהל אשר לא-התקדשו והלוים על-שחיטת הפסחים לכל לא טהור להקדיש ליהוה.
2CHRON 30:18 כי מרבית העם רבת מאפרים ומנשה יששכר וזבלון לא הטהרו כי-אכלו את-הפסח בלא ככתוב כי התפלל יחזקיהו עליהם לאמר יהוה הטוב יכפר בעד.
2CHRON 30:19 כל-לבבו הכין לדרוש האלהים יהוה אלהי אבותיו ולא כטהרת הקדש.
2CHRON 30:20 וישמע יהוה אל-יחזקיהו וירפא את-העם.
2CHRON 30:21 ויעשו בני-ישראל הנמצאים בירושלם את-חג המצות שבעת ימים בשמחה גדולה ומהללים ליהוה יום ביום הלוים והכהנים בכלי-עז ליהוה.
2CHRON 30:22 וידבר יחזקיהו על-לב כל-הלוים המשכילים שכל-טוב ליהוה ויאכלו את-המועד שבעת הימים מזבחים זבחי שלמים ומתודים ליהוה אלהי אבותיהם.
2CHRON 30:23 ויועצו כל-הקהל לעשות שבעת ימים אחרים ויעשו שבעת-ימים שמחה.
2CHRON 30:24 כי חזקיהו מלך-יהודה הרים לקהל אלף פרים ושבעת אלפים צאן והשרים הרימו לקהל פרים אלף וצאן עשרת אלפים ויתקדשו כהנים לרב.
2CHRON 30:25 וישמחו כל-קהל יהודה והכהנים והלוים וכל-הקהל הבאים מישראל edbxim הבאים מארץ ישראל והיושבים ביהודה.
2CHRON 30:26 ותהי שמחה-גדולה בירושלם כי מימי שלמה בן-דויד מלך ישראל לא כזאת בירושלם.
2CHRON 30:27 ויקמו הכהנים הלוים ויברכו את-העם וישמע בקולם ותבוא תפלתם למעון קדשו לשמים.