2CHRON 9:1 ומלכת-שבא שמעה את-שמע שלמה ותבוא לנסות את-שלמה בחידות בירושלם בחיל כבד מאד וגמלים נשאים בשמים וזהב לרב ואבן יקרה ותבוא אל- שלמה ותדבר עמו את כל-אשר היה עם-לבבה.
2CHRON 9:2 ויגד-לה שלמה את-כל-דבריה ולא-נעלם דבר משלמה אשר לא הגיד לה.
2CHRON 9:3 ותרא מלכת-שבא את חכמת שלמה והבית אשר בנה.
2CHRON 9:4 ומאכל שלחנו ומושב עבדיו ומעמד משרתיו ומלבושיהם ומשקיו ומלבושיהם ועליתו אשר יעלה בית יהוה ולא-היה עוד בה רוח.
2CHRON 9:5 ותאמר אל-המלך אמת הדבר אשר שמעתי בארצי על-דבריך ועל-חכמתך.
2CHRON 9:6 ולא-האמנתי לדבריהם עד אשר-באתי ותראינה עיני והנה לא הגד-לי חצי מרבית חכמתך יספת על-השמועה אשר שמעתי.
2CHRON 9:7 אשרי אנשיך ואשרי עבדיך אלה העמדים לפניך תמיד ושמעים את-חכמתך.
2CHRON 9:8 יהי יהוה אלהיך ברוך אשר חפץ בך לתתך על-כסאו למלך ליהוה אלהיך באהבת אלהיך את-ישראל להעמידו לעולם ויתנך עליהם למלך לעשות משפט וצדקה.
2CHRON 9:9 ותתן למלך מאה ועשרים ככר זהב ובשמים לרב מאד ואבן יקרה ולא היה כבשם ההוא אשר-נתנה מלכת-שבא למלך שלמה.
2CHRON 9:10 וגם-עבדי חירם ועבדי שלמה אשר-הביאו זהב מאופיר הביאו עצי אלגומים ואבן יקרה.
2CHRON 9:11 ויעש המלך את-עצי האלגומים מסלות לבית-יהוה ולבית המלך וכנרות ונבלים לשרים ולא-נראו כהם לפנים בארץ יהודה.
2CHRON 9:12 והמלך שלמה נתן למלכת-שבא את-כל-חפצה אשר שאלה מלבד אשר-הביאה אל-המלך ותהפך ותלך לארצה היא ועבדיה.
2CHRON 9:13 ויהי משקל הזהב אשר-בא לשלמה בשנה אחת שש מאות וששים ושש ככרי זהב.
2CHRON 9:14 לבד מאנשי התרים והסחרים מביאים וכל-מלכי ערב ופחות הארץ מביאים זהב וכסף לשלמה.
2CHRON 9:15 ויעש המלך שלמה מאתים צנה זהב שחוט שש מאות זהב שחוט יעלה על- הצנה האחת.
2CHRON 9:16 ושלש-מאות מגנים זהב שחוט שלש מאות זהב יעלה על-המגן האחת ויתנם המלך בבית יער הלבנון.
2CHRON 9:17 ויעש המלך כסא-שן גדול ויצפהו זהב טהור.
2CHRON 9:18 ושש מעלות לכסא וכבש בזהב לכסא מאחזים וידות מזה ומזה על-מקום השבת ושנים אריות עמדים אצל הידות.
2CHRON 9:19 ושנים עשר אריות עמדים שם על-שש המעלות מזה ומזה לא-נעשה כן לכל-ממלכה.
2CHRON 9:20 וכל כלי משקה המלך שלמה זהב וכל כלי בית-יער הלבנון זהב סגור אין כסף נחשב בימי שלמה למאומה.
2CHRON 9:21 כי-אניות למלך הלכות תרשיש עם עבדי חורם אחת לשלוש שנים תבואנה אניות תרשיש נשאות זהב וכסף שנהבים וקופים ותוכיים.
2CHRON 9:22 ויגדל המלך שלמה מכל מלכי הארץ לעשר וחכמה.
2CHRON 9:23 וכל מלכי הארץ מבקשים את-פני שלמה לשמע את-חכמתו אשר-נתן האלהים בלבו.
2CHRON 9:24 והם מביאים איש מנחתו כלי כסף וכלי זהב ושלמות נשק ובשמים סוסים ופרדים דבר-שנה בשנה.
2CHRON 9:25 ויהי לשלמה ארבעת אלפים אריות סוסים ומרכבות ושנים-עשר אלף פרשים ויניחם בערי הרכב ועם-המלך בירושלם.
2CHRON 9:26 ויהי מושל בכל-המלכים מן-הנהר ועד-ארץ פלשתים ועד גבול מצרים.
2CHRON 9:27 ויתן המלך את-הכסף בירושלם כאבנים ואת הארזים נתן כשקמים אשר- בשפלה לרב.
2CHRON 9:28 ומוציאים סוסים ממצרים לשלמה ומכל-הארצות.
2CHRON 9:29 ושאר דברי שלמה הראשנים והאחרונים הלא-הם כתובים על-דברי נתן הנביא ועל-נבואת אחיה השילוני ובחזות יעדי החזה על-ירבעם בן-נבט.
2CHRON 9:30 וימלך שלמה בירושלם על-כל-ישראל ארבעים שנה.
2CHRON 9:31 וישכב שלמה עם-אבתיו ויקברהו בעיר דויד אביו וימלך רחבעם בנו תחתיו.