EX 1:1 ואלה שמות בני ישראל הבאים מצרימה את יעקב איש וביתו באו.
EX 1:2 ראובן שמעון לוי ויהודה.
EX 1:3 יששכר זבולן ובנימן.
EX 1:4 דן ונפתלי גד ואשר.
EX 1:5 ויהי כל-נפש יצאי ירך-יעקב שבעים נפש ויוסף היה במצרים.
EX 1:6 וימת יוסף וכל-אחיו וכל הדור ההוא.
EX 1:7 ובני ישראל פרו וישרצו וירבו ויעצמו במאד מאד ותמלא הארץ אתם.
EX 1:8 ויקם מלך-חדש על-מצרים אשר לא-ידע את-יוסף.
EX 1:9 ויאמר אל-עמו הנה עם בני ישראל רב ועצום ממנו.
EX 1:10 הבה נתחכמה לו פן-ירבה והיה כי-תקראנה מלחמה ונוסף גם-הוא על- שנאינו ונלחם-בנו ועלה מן-הארץ.
EX 1:11 וישימו עליו שרי מסים למען ענתו בסבלתם ויבן ערי מסכנות לפרעה את-פתם ואת-רעמסס.
EX 1:12 וכאשר יענו אתו כן ירבה וכן יפרץ ויקצו מפני בני ישראל.
EX 1:13 ויעבדו מצרים את-בני ישראל בפרך.
EX 1:14 וימררו את-חייהם בעבדה קשה בחמר ובלבנים ובכל-עבדה בשדה את כל- עבדתם אשר-עבדו בהם בפרך.
EX 1:15 ויאמר מלך מצרים למילדת העברית אשר שם האחת שפרה ושם השנית פועה.
EX 1:16 ויאמר בילדכן את-העבריות וראיתן על-האבנים אם-בן הוא והמתן אתו ואם-בת הוא וחיה.
EX 1:17 ותיראן המילדת את-האלהים ולא עשו כאשר דבר אליהן מלך מצרים ותחיין את-הילדים.
EX 1:18 ויקרא מלך-מצרים למילדת ויאמר להן מדוע עשיתן הדבר הזה ותחיין את-הילדים.
EX 1:19 ותאמרן המילדת אל-פרעה כי לא כנשים המצרית העברית כי-חיות הנה בטרם תבוא אלהן המילדת וילדו.
EX 1:20 וייטב אלהים למילדת וירב העם ויעצמו מאד.
EX 1:21 ויהי כי-יראו המילדת את-האלהים ויעש להם בתים.
EX 1:22 ויצו פרעה לכל-עמו לאמר כל-הבן הילוד היארה תשליכהו וכל-הבת תחיון.