EX 37:1 ויעש בצלאל את-הארן עצי שטים אמתים וחצי ארכו ואמה וחצי רחבו ואמה וחצי קמתו.
EX 37:2 ויצפהו זהב טהור מבית ומחוץ ויעש לו זר זהב סביב.
EX 37:3 ויצק לו ארבע טבעת זהב על ארבע פעמתיו ושתי טבעת על-צלעו האחת ושתי טבעת על-צלעו השנית.
EX 37:4 ויעש בדי עצי שטים ויצף אתם זהב.
EX 37:5 ויבא את-הבדים בטבעת על צלעת הארן לשאת את-הארן.
EX 37:6 ויעש כפרת זהב טהור אמתים וחצי ארכה ואמה וחצי רחבה.
EX 37:7 ויעש שני כרבים זהב מקשה עשה אתם משני קצות הכפרת.
EX 37:8 כרוב-אחד מקצה מזה וכרוב-אחד מקצה מזה מן-הכפרת עשה את-הכרבים משני קצוותו.
EX 37:9 ויהיו הכרבים פרשי כנפים למעלה סככים בכנפיהם על-הכפרת ופניהם איש אל-אחיו אל-הכפרת היו פני הכרבים.
EX 37:10 ויעש את-השלחן עצי שטים אמתים ארכו ואמה רחבו ואמה וחצי קמתו.
EX 37:11 ויצף אתו זהב טהור ויעש לו זר זהב סביב.
EX 37:12 ויעש לו מסגרת טפח סביב ויעש זר-זהב למסגרתו סביב.
EX 37:13 ויצק לו ארבע טבעת זהב ויתן את-הטבעת על ארבע הפאת אשר לארבע רגליו.
EX 37:14 לעמת המסגרת היו הטבעת בתים לבדים לשאת את-השלחן.
EX 37:15 ויעש את-הבדים עצי שטים ויצף אתם זהב לשאת את-השלחן.
EX 37:16 ויעש את-הכלים אשר על-השלחן את-קערתיו ואת-כפתיו ואת מנקיתיו ואת-הקשות אשר יסך בהן זהב טהור.
EX 37:17 ויעש את-המנרה זהב טהור מקשה עשה את-המנרה ירכה וקנה גביעיה כפתריה ופרחיה ממנה היו.
EX 37:18 וששה קנים יצאים מצדיה שלשה קני מנרה מצדה האחד ושלשה קני מנרה מצדה השני.
EX 37:19 שלשה גבעים משקדים בקנה האחד כפתר ופרח ושלשה גבעים משקדים בקנה אחד כפתר ופרח כן לששת הקנים היצאים מן-המנרה.
EX 37:20 ובמנרה ארבעה גבעים משקדים כפתריה ופרחיה.
EX 37:21 וכפתר תחת שני הקנים ממנה וכפתר תחת שני הקנים ממנה וכפתר תחת- שני הקנים ממנה לששת הקנים היצאים ממנה.
EX 37:22 כפתריהם וקנתם ממנה היו כלה מקשה אחת זהב טהור.
EX 37:23 ויעש את-נרתיה שבעה ומלקחיה ומחתתיה זהב טהור.
EX 37:24 ככר זהב טהור עשה אתה ואת כל-כליה.
EX 37:25 ויעש את-מזבח הקטרת עצי שטים אמה ארכו ואמה רחבו רבוע ואמתים קמתו ממנו היו קרנתיו.
EX 37:26 ויצף אתו זהב טהור את-גגו ואת-קירתיו סביב ואת-קרנתיו ויעש לו זר זהב סביב.
EX 37:27 ושתי טבעת זהב עשה-לו מתחת לזרו על שתי צלעתיו על שני צדיו לבתים לבדים לשאת אתו בהם.
EX 37:28 ויעש את-הבדים עצי שטים ויצף אתם זהב.
EX 37:29 ויעש את-שמן המשחה קדש ואת-קטרת הסמים טהור מעשה רקח.