EX 27:1 ועשית את-המזבח עצי שטים חמש אמות ארך וחמש אמות רחב רבוע יהיה המזבח ושלש אמות קמתו.
EX 27:2 ועשית קרנתיו על ארבע פנתיו ממנו תהיין קרנתיו וצפית אתו נחשת.
EX 27:3 ועשית סירתיו לדשנו ויעיו ומזרקתיו ומזלגתיו ומחתתיו לכל-כליו תעשה נחשת.
EX 27:4 ועשית לו מכבר מעשה רשת נחשת ועשית על-הרשת ארבע טבעת נחשת על ארבע קצותיו.
EX 27:5 ונתתה אתה תחת כרכב המזבח מלמטה והיתה הרשת עד חצי המזבח.
EX 27:6 ועשית בדים למזבח בדי עצי שטים וצפית אתם נחשת.
EX 27:7 והובא את-בדיו בטבעת והיו הבדים על-שתי צלעת המזבח בשאת אתו.
EX 27:8 נבוב לחת תעשה אתו כאשר הראה אתך בהר כן יעשו.
EX 27:9 ועשית את חצר המשכן לפאת נגב-תימנה קלעים לחצר שש משזר מאה באמה ארך לפאה האחת.
EX 27:10 ועמדיו עשרים ואדניהם עשרים נחשת ווי העמדים וחשקיהם כסף.
EX 27:11 וכן לפאת צפון בארך קלעים מאה ארך ועמדו עשרים ואדניהם עשרים נחשת ווי העמדים וחשקיהם כסף.
EX 27:12 ורחב החצר לפאת-ים קלעים חמשים אמה עמדיהם עשרה ואדניהם עשרה.
EX 27:13 ורחב החצר לפאת קדמה מזרחה חמשים אמה.
EX 27:14 וחמש עשרה אמה קלעים לכתף עמדיהם שלשה ואדניהם שלשה.
EX 27:15 ולכתף השנית חמש עשרה קלעים עמדיהם שלשה ואדניהם שלשה.
EX 27:16 ולשער החצר מסך עשרים אמה תכלת וארגמן ותולעת שני ושש משזר מעשה רקם עמדיהם ארבעה ואדניהם ארבעה.
EX 27:17 כל-עמודי החצר סביב מחשקים כסף וויהם כסף ואדניהם נחשת.
EX 27:18 ארך החצר מאה באמה ורחב חמשים בחמשים וקמה חמש אמות שש משזר ואדניהם נחשת.
EX 27:19 לכל כלי המשכן בכל עבדתו וכל-יתדתיו וכל-יתדת החצר נחשת.
EX 27:20 ואתה תצוה את-בני ישראל ויקחו אליך שמן זית זך כתית למאור להעלת נר תמיד.
EX 27:21 באהל מועד מחוץ לפרכת אשר על-העדת יערך אתו אהרן ובניו מערב עד- בקר לפני יהוה חקת עולם לדרתם מאת בני ישראל.