EX 30:1 ועשית מזבח מקטר קטרת עצי שטים תעשה אתו.
EX 30:2 אמה ארכו ואמה רחבו רבוע יהיה ואמתים קמתו ממנו קרנתיו.
EX 30:3 וצפית אתו זהב טהור את-גגו ואת-קירתיו סביב ואת-קרנתיו ועשית לו זר זהב סביב.
EX 30:4 ושתי טבעת זהב תעשה-לו מתחת לזרו על שתי צלעתיו תעשה על-שני צדיו והיה לבתים לבדים לשאת אתו בהמה.
EX 30:5 ועשית את-הבדים עצי שטים וצפית אתם זהב.
EX 30:6 ונתתה אתו לפני הפרכת אשר על-ארן העדת לפני הכפרת אשר על-העדת אשר אועד לך שמה.
EX 30:7 והקטיר עליו אהרן קטרת סמים בבקר בבקר בהיטיבו את-הנרת יקטירנה.
EX 30:8 ובהעלת אהרן את-הנרת בין הערבים יקטירנה קטרת תמיד לפני יהוה לדרתיכם.
EX 30:9 לא-תעלו עליו קטרת זרה ועלה ומנחה ונסך לא תסכו עליו.
EX 30:10 וכפר אהרן על-קרנתיו אחת בשנה מדם חטאת הכפרים אחת בשנה יכפר עליו לדרתיכם קדש-קדשים הוא ליהוה.
EX 30:11 וידבר יהוה אל-משה לאמר.
EX 30:12 כי תשא את-ראש בני-ישראל לפקדיהם ונתנו איש כפר נפשו ליהוה בפקד אתם ולא-יהיה בהם נגף בפקד אתם.
EX 30:13 זה יתנו כל-העבר על-הפקדים מחצית השקל בשקל הקדש עשרים גרה השקל מחצית השקל תרומה ליהוה.
EX 30:14 כל העבר על-הפקדים מבן עשרים שנה ומעלה יתן תרומת יהוה.
EX 30:15 העשיר לא-ירבה והדל לא ימעיט ממחצית השקל לתת את-תרומת יהוה לכפר על-נפשתיכם.
EX 30:16 ולקחת את-כסף הכפרים מאת בני ישראל ונתת אתו על-עבדת אהל מועד והיה לבני ישראל לזכרון לפני יהוה לכפר על-נפשתיכם.
EX 30:17 וידבר יהוה אל-משה לאמר.
EX 30:18 ועשית כיור נחשת וכנו נחשת לרחצה ונתת אתו בין-אהל מועד ובין המזבח ונתת שמה מים.
EX 30:19 ורחצו אהרן ובניו ממנו את-ידיהם ואת-רגליהם.
EX 30:20 בבאם אל-אהל מועד ירחצו-מים ולא ימתו או בגשתם אל-המזבח לשרת להקטיר אשה ליהוה.
EX 30:21 ורחצו ידיהם ורגליהם ולא ימתו והיתה להם חק-עולם לו ולזרעו לדרתם.
EX 30:22 וידבר יהוה אל-משה לאמר.
EX 30:23 ואתה קח-לך בשמים ראש מר-דרור חמש מאות וקנמן-בשם מחציתו חמשים ומאתים וקנה-בשם חמשים ומאתים.
EX 30:24 וקדה חמש מאות בשקל הקדש ושמן זית הין.
EX 30:25 ועשית אתו שמן משחת-קדש רקח מרקחת מעשה רקח שמן משחת-קדש יהיה.
EX 30:26 ומשחת בו את-אהל מועד ואת ארון העדת.
EX 30:27 ואת-השלחן ואת-כל-כליו ואת-המנרה ואת-כליה ואת מזבח הקטרת.
EX 30:28 ואת-מזבח העלה ואת-כל-כליו ואת-הכיר ואת-כנו.
EX 30:29 וקדשת אתם והיו קדש קדשים כל-הנגע בהם יקדש.
EX 30:30 ואת-אהרן ואת-בניו תמשח וקדשת אתם לכהן לי.
EX 30:31 ואל-בני ישראל תדבר לאמר שמן משחת-קדש יהיה זה לי לדרתיכם.
EX 30:32 על-בשר אדם לא ייסך ובמתכנתו לא תעשו כמהו קדש הוא קדש יהיה לכם.
EX 30:33 איש אשר ירקח כמהו ואשר יתן ממנו על-זר ונכרת מעמיו.
EX 30:34 ויאמר יהוה אל-משה קח-לך סמים נטף ושחלת וחלבנה סמים ולבנה זכה בד בבד יהיה.
EX 30:35 ועשית אתה קטרת רקח מעשה רוקח ממלח טהור קדש.
EX 30:36 ושחקת ממנה הדק ונתתה ממנה לפני העדת באהל מועד אשר אועד לך שמה קדש קדשים תהיה לכם.
EX 30:37 והקטרת אשר תעשה במתכנתה לא תעשו לכם קדש תהיה לך ליהוה.
EX 30:38 איש אשר-יעשה כמוה להריח בה ונכרת מעמיו.