EX 4:1 ויען משה ויאמר והן לא-יאמינו לי ולא ישמעו בקלי כי יאמרו לא- נראה אליך יהוה.
EX 4:2 ויאמר אליו יהוה מזה בידך ויאמר מטה.
EX 4:3 ויאמר השליכהו ארצה וישלכהו ארצה ויהי לנחש וינס משה מפניו.
EX 4:4 ויאמר יהוה אל-משה שלח ידך ואחז בזנבו וישלח ידו ויחזק בו ויהי למטה בכפו.
EX 4:5 למען יאמינו כי-נראה אליך יהוה אלהי אבתם אלהי אברהם אלהי יצחק ואלהי יעקב.
EX 4:6 ויאמר יהוה לו עוד הבא-נא ידך בחיקך ויבא ידו בחיקו ויוצאה והנה ידו מצרעת כשלג.
EX 4:7 ויאמר השב ידך אל-חיקך וישב ידו אל-חיקו ויוצאה מחיקו והנה-שבה כבשרו.
EX 4:8 והיה אם-לא יאמינו לך ולא ישמעו לקל האת הראשון והאמינו לקל האת האחרון.
EX 4:9 והיה אם-לא יאמינו גם לשני האתות האלה ולא ישמעון לקלך ולקחת ממימי היאר ושפכת היבשה והיו המים אשר תקח מן-היאר והיו לדם ביבשת.
EX 4:10 ויאמר משה אל-יהוה בי אדני לא איש דברים אנכי גם מתמול גם משלשם גם מאז דברך אל-עבדך כי כבד-פה וכבד לשון אנכי.
EX 4:11 ויאמר יהוה אליו מי שם פה לאדם או מי-ישום אלם או חרש או פקח או עור הלא אנכי יהוה.
EX 4:12 ועתה לך ואנכי אהיה עם-פיך והוריתיך אשר תדבר.
EX 4:13 ויאמר בי אדני שלח-נא ביד-תשלח.
EX 4:14 ויחר-אף יהוה במשה ויאמר הלא אהרן אחיך הלוי ידעתי כי-דבר ידבר הוא וגם הנה-הוא יצא לקראתך וראך ושמח בלבו.
EX 4:15 ודברת אליו ושמת את-הדברים בפיו ואנכי אהיה עם-פיך ועם-פיהו והוריתי אתכם את אשר תעשון.
EX 4:16 ודבר-הוא לך אל-העם והיה הוא יהיה-לך לפה ואתה תהיה-לו לאלהים.
EX 4:17 ואת-המטה הזה תקח בידך אשר תעשה-בו את-האתת.
EX 4:18 וילך משה וישב אל-יתר חתנו ויאמר לו אלכה נא ואשובה אל-אחי אשר- במצרים ואראה העודם חיים ויאמר יתרו למשה לך לשלום.
EX 4:19 ויאמר יהוה אל-משה במדין לך שב מצרים כי-מתו כל-האנשים המבקשים את-נפשך.
EX 4:20 ויקח משה את-אשתו ואת-בניו וירכבם על-החמר וישב ארצה מצרים ויקח משה את-מטה האלהים בידו.
EX 4:21 ויאמר יהוה אל-משה בלכתך לשוב מצרימה ראה כל-המפתים אשר-שמתי בידך ועשיתם לפני פרעה ואני אחזק את-לבו ולא ישלח את-העם.
EX 4:22 ואמרת אל-פרעה כה אמר יהוה בני בכרי ישראל.
EX 4:23 ואמר אליך שלח את-בני ויעבדני ותמאן לשלחו הנה אנכי הרג את-בנך בכרך.
EX 4:24 ויהי בדרך במלון ויפגשהו יהוה ויבקש המיתו.
EX 4:25 ותקח צפרה צר ותכרת את-ערלת בנה ותגע לרגליו ותאמר כי חתן-דמים אתה לי.
EX 4:26 וירף ממנו אז אמרה חתן דמים למולת.
EX 4:27 ויאמר יהוה אל-אהרן לך לקראת משה המדברה וילך ויפגשהו בהר האלהים וישק-לו.
EX 4:28 ויגד משה לאהרן את כל-דברי יהוה אשר שלחו ואת כל-האתת אשר צוהו.
EX 4:29 וילך משה ואהרן ויאספו את-כל-זקני בני ישראל.
EX 4:30 וידבר אהרן את כל-הדברים אשר-דבר יהוה אל-משה ויעש האתת לעיני העם.
EX 4:31 ויאמן העם וישמעו כי-פקד יהוה את-בני ישראל וכי ראה את-ענים ויקדו וישתחוו.