EX 12:1 ויאמר יהוה אל-משה ואל-אהרן בארץ מצרים לאמר.
EX 12:2 החדש הזה לכם ראש חדשים ראשון הוא לכם לחדשי השנה.
EX 12:3 דברו אל-כל-עדת ישראל לאמר בעשר לחדש הזה ויקחו להם איש שה לבית- אבת שה לבית.
EX 12:4 ואם-ימעט הבית מהיות משה ולקח הוא ושכנו הקרב אל-ביתו במכסת נפשת איש לפי אכלו תכסו על-השה.
EX 12:5 שה תמים זכר בן-שנה יהיה לכם מן-הכבשים ומן-העזים תקחו.
EX 12:6 והיה לכם למשמרת עד ארבעה עשר יום לחדש הזה ושחטו אתו כל קהל עדת-ישראל בין הערבים.
EX 12:7 ולקחו מן-הדם ונתנו על-שתי המזוזת ועל-המשקוף על הבתים אשר- יאכלו אתו בהם.
EX 12:8 ואכלו את-הבשר בלילה הזה צלי-אש ומצות על-מררים יאכלהו.
EX 12:9 אל-תאכלו ממנו נא ובשל מבשל במים כי אם-צלי-אש ראשו על-כרעיו ועל-קרבו.
EX 12:10 ולא-תותירו ממנו עד-בקר והנתר ממנו עד-בקר באש תשרפו.
EX 12:11 וככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה.
EX 12:12 ועברתי בארץ-מצרים בלילה הזה והכיתי כל-בכור בארץ מצרים מאדם ועד-בהמה ובכל-אלהי מצרים אעשה שפטים אני יהוה.
EX 12:13 והיה הדם לכם לאת על הבתים אשר אתם שם וראיתי את-הדם ופסחתי עלכם ולא-יהיה בכם נגף למשחית בהכתי בארץ מצרים.
EX 12:14 והיה היום הזה לכם לזכרון וחגתם אתו חג ליהוה לדרתיכם חקת עולם תחגהו.
EX 12:15 שבעת ימים מצות תאכלו אך ביום הראשון תשביתו שאר מבתיכם כי כל- אכל חמץ ונכרתה הנפש ההוא מישראל מיום הראשן עד-יום השבעי.
EX 12:16 וביום הראשון מקרא-קדש וביום השביעי מקרא-קדש יהיה לכם כל- מלאכה לא-יעשה בהם אך אשר יאכל לכל-נפש הוא לבדו יעשה לכם.
EX 12:17 ושמרתם את-המצות כי בעצם היום הזה הוצאתי את-צבאותיכם מארץ מצרים ושמרתם את-היום הזה לדרתיכם חקת עולם.
EX 12:18 בראשן בארבעה עשר יום לחדש בערב תאכלו מצת עד יום האחד ועשרים לחדש בערב.
EX 12:19 שבעת ימים שאר לא ימצא בבתיכם כי כל-אכל מחמצת ונכרתה הנפש ההוא מעדת ישראל בגר ובאזרח הארץ.
EX 12:20 כל-מחמצת לא תאכלו בכל מושבתיכם תאכלו מצות.
EX 12:21 ויקרא משה לכל-זקני ישראל ויאמר אלהם משכו וקחו לכם צאן למשפחתיכם ושחטו הפסח.
EX 12:22 ולקחתם אגדת אזוב וטבלתם בדם אשר-בסף והגעתם אל-המשקוף ואל-שתי המזוזת מן-הדם אשר בסף ואתם לא תצאו איש מפתח-ביתו עד-בקר.
EX 12:23 ועבר יהוה לנגף את-מצרים וראה את-הדם על-המשקוף ועל שתי המזוזת ופסח יהוה על-הפתח ולא יתן המשחית לבא אל-בתיכם לנגף.
EX 12:24 ושמרתם את-הדבר הזה לחק-לך ולבניך עד-עולם.
EX 12:25 והיה כי-תבאו אל-הארץ אשר יתן יהוה לכם כאשר דבר ושמרתם את- העבדה הזאת.
EX 12:26 והיה כי-יאמרו אליכם בניכם מה העבדה הזאת לכם.
EX 12:27 ואמרתם זבח-פסח הוא ליהוה אשר פסח על-בתי בני-ישראל במצרים בנגפו את-מצרים ואת-בתינו הציל ויקד העם וישתחוו.
EX 12:28 וילכו ויעשו בני ישראל כאשר צוה יהוה את-משה ואהרן כן עשו.
EX 12:29 ויהי בחצי הלילה ויהוה הכה כל-בכור בארץ מצרים מבכר פרעה הישב על-כסאו עד בכור השבי אשר בבית הבור וכל בכור בהמה.
EX 12:30 ויקם פרעה לילה הוא וכל-עבדיו וכל-מצרים ותהי צעקה גדלה במצרים כי-אין בית אשר אין-שם מת.
EX 12:31 ויקרא למשה ולאהרן לילה ויאמר קומו צאו מתוך עמי גם-אתם גם-בני ישראל ולכו עבדו את-יהוה כדברכם.
EX 12:32 גם-צאנכם גם-בקרכם קחו כאשר דברתם ולכו וברכתם גם-אתי.
EX 12:33 ותחזק מצרים על-העם למהר לשלחם מן-הארץ כי אמרו כלנו מתים.
EX 12:34 וישא העם את-בצקו טרם יחמץ משארתם צררת בשמלתם על-שכמם.
EX 12:35 ובני-ישראל עשו כדבר משה וישאלו ממצרים כלי-כסף וכלי זהב ושמלת.
EX 12:36 ויהוה נתן את-חן העם בעיני מצרים וישאלום וינצלו את-מצרים.
EX 12:37 ויסעו בני-ישראל מרעמסס סכתה כשש-מאות אלף רגלי הגברים לבד מטף.
EX 12:38 וגם-ערב רב עלה אתם וצאן ובקר מקנה כבד מאד.
EX 12:39 ויאפו את-הבצק אשר הוציאו ממצרים עגת מצות כי לא חמץ כי-גרשו ממצרים ולא יכלו להתמהמה וגם-צדה לא-עשו להם.
EX 12:40 ומושב בני ישראל אשר ישבו במצרים שלשים שנה וארבע מאות שנה.
EX 12:41 ויהי מקץ שלשים שנה וארבע מאות שנה ויהי בעצם היום הזה יצאו כל- צבאות יהוה מארץ מצרים.
EX 12:42 ליל שמרים הוא ליהוה להוציאם מארץ מצרים הוא-הלילה הזה ליהוה שמרים לכל-בני ישראל לדרתם.
EX 12:43 ויאמר יהוה אל-משה ואהרן זאת חקת הפסח כל-בן-נכר לא-יאכל בו.
EX 12:44 וכל-עבד איש מקנת-כסף ומלתה אתו אז יאכל בו.
EX 12:45 תושב ושכיר לא-יאכל-בו.
EX 12:46 בבית אחד יאכל לא-תוציא מן-הבית מן-הבשר חוצה ועצם לא תשברו- בו.
EX 12:47 כל-עדת ישראל יעשו אתו.
EX 12:48 וכי-יגור אתך גר ועשה פסח ליהוה המול לו כל-זכר ואז יקרב לעשתו והיה כאזרח הארץ וכל-ערל לא-יאכל בו.
EX 12:49 תורה אחת יהיה לאזרח ולגר הגר בתוככם.
EX 12:50 ויעשו כל-בני ישראל כאשר צוה יהוה את-משה ואת-אהרן כן עשו.
EX 12:51 ויהי בעצם היום הזה הוציא יהוה את-בני ישראל מארץ מצרים על- צבאתם.