EX 5:1 ואחר באו משה ואהרן ויאמרו אל-פרעה כה-אמר יהוה אלהי ישראל שלח את-עמי ויחגו לי במדבר.
EX 5:2 ויאמר פרעה מי יהוה אשר אשמע בקלו לשלח את-ישראל לא ידעתי את- יהוה וגם את-ישראל לא אשלח.
EX 5:3 ויאמרו אלהי העברים נקרא עלינו נלכה נא דרך שלשת ימים במדבר ונזבחה ליהוה אלהינו פן-יפגענו בדבר או בחרב.
EX 5:4 ויאמר אלהם מלך מצרים למה משה ואהרן תפריעו את-העם ממעשיו לכו לסבלתיכם.
EX 5:5 ויאמר פרעה הן-רבים עתה עם הארץ והשבתם אתם מסבלתם.
EX 5:6 ויצו פרעה ביום ההוא את-הנגשים בעם ואת-שטריו לאמר.
EX 5:7 לא תאספון לתת תבן לעם ללבן הלבנים כתמול שלשם הם ילכו וקששו להם תבן.
EX 5:8 ואת-מתכנת הלבנים אשר הם עשים תמול שלשם תשימו עליהם לא תגרעו ממנו כי-נרפים הם על-כן הם צעקים לאמר נלכה נזבחה לאלהינו.
EX 5:9 תכבד העבדה על-האנשים ויעשו-בה ואל-ישעו בדברי-שקר.
EX 5:10 ויצאו נגשי העם ושטריו ויאמרו אל-העם לאמר כה אמר פרעה אינני נתן לכם תבן.
EX 5:11 אתם לכו קחו לכם תבן מאשר תמצאו כי אין נגרע מעבדתכם דבר.
EX 5:12 ויפץ העם בכל-ארץ מצרים לקשש קש לתבן.
EX 5:13 והנגשים אצים לאמר כלו מעשיכם דבר-יום ביומו כאשר בהיות התבן.
EX 5:14 ויכו שטרי בני ישראל אשר-שמו עלהם נגשי פרעה לאמר מדוע לא כליתם חקכם ללבן כתמול שלשם גם-תמול גם-היום.
EX 5:15 ויבאו שטרי בני ישראל ויצעקו אל-פרעה לאמר למה תעשה כה לעבדיך.
EX 5:16 תבן אין נתן לעבדיך ולבנים אמרים לנו עשו והנה עבדיך מכים וחטאת עמך.
EX 5:17 ויאמר נרפים אתם נרפים על-כן אתם אמרים נלכה נזבחה ליהוה.
EX 5:18 ועתה לכו עבדו ותבן לא-ינתן לכם ותכן לבנים תתנו.
EX 5:19 ויראו שטרי בני-ישראל אתם ברע לאמר לא-תגרעו מלבניכם דבר-יום ביומו.
EX 5:20 ויפגעו את-משה ואת-אהרן נצבים לקראתם בצאתם מאת פרעה.
EX 5:21 ויאמרו אלהם ירא יהוה עליכם וישפט אשר הבאשתם את-ריחנו בעיני פרעה ובעיני עבדיו לתת-חרב בידם להרגנו.
EX 5:22 וישב משה אל-יהוה ויאמר אדני למה הרעתה לעם הזה למה זה שלחתני.
EX 5:23 ומאז באתי אל-פרעה לדבר בשמך הרע לעם הזה והצל לא-הצלת את-עמך.