EX 28:1 ואתה הקרב אליך את-אהרן אחיך ואת-בניו אתו מתוך בני ישראל לכהנו- לי אהרן נדב ואביהוא אלעזר ואיתמר בני אהרן.
EX 28:2 ועשית בגדי-קדש לאהרן אחיך לכבוד ולתפארת.
EX 28:3 ואתה תדבר אל-כל-חכמי-לב אשר מלאתיו רוח חכמה ועשו את-בגדי אהרן לקדשו לכהנו-לי.
EX 28:4 ואלה הבגדים אשר יעשו חשן ואפוד ומעיל וכתנת תשבץ מצנפת ואבנט ועשו בגדי-קדש לאהרן אחיך ולבניו לכהנו-לי.
EX 28:5 והם יקחו את-הזהב ואת-התכלת ואת-הארגמן ואת-תולעת השני ואת-השש.
EX 28:6 ועשו את-האפד זהב תכלת וארגמן תולעת שני ושש משזר מעשה חשב.
EX 28:7 שתי כתפת חברת יהיה-לו אל-שני קצותיו וחבר.
EX 28:8 וחשב אפדתו אשר עליו כמעשהו ממנו יהיה זהב תכלת וארגמן ותולעת שני ושש משזר.
EX 28:9 ולקחת את-שתי אבני-שהם ופתחת עליהם שמות בני ישראל.
EX 28:10 ששה משמתם על האבן האחת ואת-שמות הששה הנותרים על-האבן השנית כתולדתם.
EX 28:11 מעשה חרש אבן פתוחי חתם תפתח את-שתי האבנים על-שמת בני ישראל מסבת משבצות זהב תעשה אתם.
EX 28:12 ושמת את-שתי האבנים על כתפת האפד אבני זכרן לבני ישראל ונשא אהרן את-שמותם לפני יהוה על-שתי כתפיו לזכרן.
EX 28:13 ועשית משבצת זהב.
EX 28:14 ושתי שרשרת זהב טהור מגבלת תעשה אתם מעשה עבת ונתתה את-שרשרת העבתת על-המשבצת.
EX 28:15 ועשית חשן משפט מעשה חשב כמעשה אפד תעשנו זהב תכלת וארגמן ותולעת שני ושש משזר תעשה אתו.
EX 28:16 רבוע יהיה כפול זרת ארכו וזרת רחבו.
EX 28:17 ומלאת בו מלאת אבן ארבעה טורים אבן טור אדם פטדה וברקת הטור האחד.
EX 28:18 והטור השני נפך ספיר ויהלם.
EX 28:19 והטור השלישי לשם שבו ואחלמה.
EX 28:20 והטור הרביעי תרשיש ושהם וישפה משבצים זהב יהיו במלואתם.
EX 28:21 והאבנים תהיין על-שמת בני-ישראל שתים עשרה על-שמתם פתוחי חותם איש על-שמו תהיין לשני עשר שבט.
EX 28:22 ועשית על-החשן שרשת גבלת מעשה עבת זהב טהור.
EX 28:23 ועשית על-החשן שתי טבעות זהב ונתת את-שתי הטבעות על-שני קצות החשן.
EX 28:24 ונתתה את-שתי עבתת הזהב על-שתי הטבעת אל-קצות החשן.
EX 28:25 ואת שתי קצות שתי העבתת תתן על-שתי המשבצות ונתתה על-כתפות האפד אל-מול פניו.
EX 28:26 ועשית שתי טבעות זהב ושמת אתם על-שני קצות החשן על-שפתו אשר אל- עבר האפוד ביתה.
EX 28:27 ועשית שתי טבעות זהב ונתתה אתם על-שתי כתפות האפוד מלמטה ממול פניו לעמת מחברתו ממעל לחשב האפוד.
EX 28:28 וירכסו את-החשן מטבעתו אל-טבעת האפוד בפתיל תכלת להיות על-חשב האפוד ולא-יזח החשן מעל האפוד.
EX 28:29 ונשא אהרן את-שמות בני-ישראל בחשן המשפט על-לבו בבאו אל-הקדש לזכרן לפני-יהוה תמיד.
EX 28:30 ונתת אל-חשן המשפט את-האורים ואת-התמים והיו על-לב אהרן בבאו לפני יהוה ונשא אהרן את-משפט בני-ישראל על-לבו לפני יהוה תמיד.
EX 28:31 ועשית את-מעיל האפוד כליל תכלת.
EX 28:32 והיה פי-ראשו בתוכו שפה יהיה לפיו סביב מעשה ארג כפי תחרא יהיה- לו לא יקרע.
EX 28:33 ועשית על-שוליו רמני תכלת וארגמן ותולעת שני על-שוליו סביב ופעמני זהב בתוכם סביב.
EX 28:34 פעמן זהב ורמון פעמן זהב ורמון על-שולי המעיל סביב.
EX 28:35 והיה על-אהרן לשרת ונשמע קולו בבאו אל-הקדש לפני יהוה ובצאתו ולא ימות.
EX 28:36 ועשית ציץ זהב טהור ופתחת עליו פתוחי חתם קדש ליהוה.
EX 28:37 ושמת אתו על-פתיל תכלת והיה על-המצנפת אל-מול פני-המצנפת יהיה.
EX 28:38 והיה על-מצח אהרן ונשא אהרן את-עון הקדשים אשר יקדישו בני ישראל לכל-מתנת קדשיהם והיה על-מצחו תמיד לרצון להם לפני יהוה.
EX 28:39 ושבצת הכתנת שש ועשית מצנפת שש ואבנט תעשה מעשה רקם.
EX 28:40 ולבני אהרן תעשה כתנת ועשית להם אבנטים ומגבעות תעשה להם לכבוד ולתפארת.
EX 28:41 והלבשת אתם את-אהרן אחיך ואת-בניו אתו ומשחת אתם ומלאת את-ידם וקדשת אתם וכהנו לי.
EX 28:42 ועשה להם מכנסי-בד לכסות בשר ערוה ממתנים ועד-ירכים יהיו.
EX 28:43 והיו על-אהרן ועל-בניו בבאם אל-אהל מועד או בגשתם אל-המזבח לשרת בקדש ולא-ישאו עון ומתו חקת עולם לו ולזרעו אחריו.